रुकुम पश्चिम -१, असार ।
रुकुम पश्चिमको त्रिवेणी गाउँपालिकामा दुध र मासु बिक्रीबाट वार्षिक आठ करोड बढी रकम भित्रिने गरेको छ । दुग्धजन्य पदार्थ तथा मासु र माछा बिक्री/निर्यातबाट आठ करोड बढी रकम पालिकामा भित्रिने गरेको पशु सेवा शाखाले जनाएको छ ।
पशु विकास अधिकृत दिपक ओलीका अनुसार गाउँपालिकामा वार्षिक २ हजार तीनसय टन दुध, तीनसय २० टन मासु र पाँच टन माछा उत्पादन हुने गरेको छ ।
जसमध्ये ६ सय ९० टन दुध, एकसय ६० टन मासु र तीन टन माछा बिक्री हुने गरेको छ । उत्पादन मध्ये ३० प्रतिशत दुध, ५० प्रतिशत मासु र ५० प्रतिशत माछा विक्री हुने गरेको पाइएको छ ।
गाउँपालिकाका किसानले दुध बिक्रीबाट २ करोड ३० लाख, मासुबाट ५ करोड ८४ लाख र माछा बिक्रीबाट करिब ८ लाख जति आम्दानी गर्दै आएका छन् ।
त्रिवेणी गाउँपालिकाका ४ हजार ४ सय घरधुरीमध्ये ८० प्रतिशत पशुपंक्षी व्यवसायमा आबद्ध छन् । यहाँका किसानले पशुपंक्षी अन्तर्गत गाई, भैँसी, भेडा, बाख्रा र कुखुरा पालन गर्दै आइरहेका छन् ।
पालिकामा हाल १ सय ४७ वटा पशु फार्म दर्ता भई सञ्चालनमा आएका छन् । माछा र मासुमा आत्मनिर्भर यस पालिका अण्डामा भने आत्मनिर्भर हुन बाँकी छ ।
