रुकुम पश्चिम -११, जेठ ।
रुकुम पश्चिमको चौरजहारी नगरपालिका -१४, तिमिले ढोलाटाकुरामा चट्याङ लागेर एक महिला घाइते भएकी छन् । सोमबार साँझ अन्दाजी ६:४५ बजेको समयमा स्थानीय धनबहादुर खड्काको घर नजिकै चट्याङ पर्दा उनकी श्रीमती अन्दाजी ५९ वर्षीया खिमी खड्का घाइते भएकी हुन् ।
चट्याङ लागेपछि उनी बेहोस भएको प्रहरीले जनाएको छ । घाइते खिमी खड्कालाई उनका छोरा दीपबहादुर खड्काले तत्काल उपचारका लागि मिसन अस्पताल चौरजहारी पुर्याएका छन् । उपचार भइरहेको र उनि बेहोस रहेको बताइएको छ ।
उक्त घटनामा खड्का परिवारको खोरमा रहेका दुई वटा बाख्राको समेत मरेको प्रहरीले जनाएको छ ।
घटनाको जानकारी प्राप्त हुनासाथ प्रहरी चौकी नुवाकोटबाट प्रहरी सहायक निरीक्षक डेनीबहादुर थापाको नेतृत्वमा तीन जनाको टोली घटनास्थलतर्फ खटिएको थियो । घटनास्थल प्रहरी चौकी नुवाकोटबाट करिब ९ किलोमिटर उत्तरतर्फ पर्ने प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ ।
