रुकुम पश्चिम -२९, वैशाख ।
रुकुम पश्चिम शाखाको एसियन लाइफ इन्स्योरेन्सले मृत्यु दाबी भुक्तानी अन्तर्गत बिमित परिवारलाई गाउँमै पुगेर मङ्गलबार रकम हस्तान्तरण गरेको छ । मुसिकोट नगरपालिका वडानम्बर -८, कि मृतक बिमित ललिता बुढामगरको गाउँमा पुगेर कम्पनीले एक कार्यक्रम आयोजना गरी बिमितकी आमाको हातमा एकलाख २७ हजार एकसय ९८ रुपैयाँको चेक हस्तान्तरण गरेको हो ।
शाखा प्रमुख याजन रोकायका अनुसार बिमित परिवारले २०७६ असोज ३० गते कम्पनीको “बाल उमंग प्लान” अन्तर्गत एकलाख रुपैयाँ बराबरको जीवन बिमा गरेका थिए । उक्त योजना अन्तर्गत वार्षिक ६ हजार ९५ रुपैयाँका दरले ६ वर्षसम्म कुल ३७ हजार ५ सय ७० रुपैयाँ प्रिमियम बुझाइएको थियो ।
तर बिमित ललिता बुढामगरको स्वास्थ्यमा समस्या देखिएपछि उनको उपचारका क्रममा ६ वर्षको कलिलै उमेरमा गत साउन २९ गते दुःखद निधन हुन पुग्यो । बिमितको असामयिक निधनपछि कम्पनीले आवश्यक प्रक्रिया पूरा गरी मृत्यु दाबी रकम स्वरूप बोनस सहित एकलाख २७ हजार एकसय ९८ रुपैयाँ परिवारलाई उपलब्ध गराएको छ ।
रकम हस्तान्तरण कार्यक्रममा शाखा प्रमुख रोकाय, मार्केटिङ असिस्टेन्ट दीपक केसी, वडा सदस्य हिमकुमार पाण्डे र तुलबहादुर बिक तथा बिमितका परिवार लगायत स्थानीयवासीको उपस्थिति रहेको थियो ।
कार्यक्रममा शाखा प्रमुख रोकायले जीवन बिमा भविष्यको सुरक्षा र आर्थिक भरोसाको माध्यम भएको उल्लेख गर्दै अप्रत्याशित घटनामा यसले परिवारलाई ठूलो राहत दिने बताए । उनले सबै नागरिकलाई आफ्नो आर्थिक क्षमता अनुसार जीवन बिमा योजनामा आबद्ध हुन आग्रह समेत गरे ।
स्थानीयवासीहरूले विपत्तिको समयमा बिमा कम्पनीले गरेको सहयोग प्रशंसनीय रहेको बताएका छन् । उनीहरूले यस्तो सेवाले बिमाप्रति नागरिकको विश्वास अझ बढ्ने विश्वास व्यक्त गरेका छन् ।
जीवन बिमाले आकस्मिक घटनाबाट सिर्जना हुने आर्थिक संकट न्यूनीकरण गर्न महत्वपूर्ण भूमिका खेल्ने भएकाले पछिल्लो समय ग्रामीण क्षेत्रमा समेत यसको पहुँच विस्तार हुँदै गएको छ । एशियन लाइफ इन्स्योरेन्स रुकुम पश्चिम शाखाले जिल्लाभर विभिन्न जीवन बिमा योजना मार्फत नागरिकलाई सेवा दिँदै आएको जनाएको छ ।
