रुकुम पश्चिम -१९, वैशाख ।
नेपाली कम्युनिष्ट पार्टीका संयोजक तथा पूर्व प्रधानमन्त्री पुष्पकमल दाहाल प्रचण्डले कामी बुढाको योगदानलाई सम्झँदै आफू पनि कामी बुढा जस्तै भएको बताएका छन् । शनिबार मुसिकोट -१०, चुन स्थित कामी बुढाको जन्म स्थानमा पुगेका प्रचण्डले बुढाले बनाएको पहिलो जनसरकारको ऐतिहासिक कामलाई सम्झँदै आफू अहिले कामी बुढा जस्तै भएको बताएका हुन् ।
रुकुममा जन्मिएका बुढाले तत्कालीन समयमा नेपालमा जनसरकार, सेना, जनसत्ता गठन र जनतालाई अधिकार दिने क्रान्ति सुरु गरेको इतिहासलाई प्रचण्डले सम्झिए । तर, बुढाले थालनी गरेको नेपालको पहिलो क्रान्ति अझै पूरा नभएकोले क्रान्तिको सपना आज पनि अधुरै रहेको उनले बताए ।
जुन तरिकाले क्रान्तिको सपना देखिएको थियो त्यो अझै बाँकी रहेकाले अब समाजवादको यात्रामा लागि परेको प्रचण्डको भनाइ छ । यो यात्रालाई पूरा गर्न अहिले धेरै कम्युनिष्ट समूहहरू एकताबद्ध भएर समाजवादको एउटा नयाँ यात्रा सुरु गर्न नेपाली कम्युनिष्ट पार्टी निर्माण गरिएको उनले बताए ।
प्रचण्डले यतिले मात्र समाजवादको यात्रा पूरा नहुने बताउँदै बाँकी रहेका सबै कम्युनिष्टलाई एकताबद्ध गर्ने अभियानमा लागि परेको ठोकुवा गरे ।
त्यसैगरी शान्ति सम्झौता र संविधान सभा भनेर आफूहरूले गणतन्त्र, समानुपातिक र समावेशितामा सबैको प्रतिनिधित्व सुनिश्चित गर्न सफल भएपनि अझ यसलाई विकसित गर्ने प्रक्रियामा रहेको संयोजक प्रचण्डले बताए । यसका लागि शान्ति सम्झौता र संविधानको पक्षधर सबै राजनीतिक शक्तिलाई मिलाएर अगाडि बढ्न बल गरिरहेको उनको भनाइ छ ।
प्रचण्डले मुसिकोटदेखि कामी बुढाको जन्मस्थल चुन पुग्ने बाटो अहिले पनि निकै अप्ठ्यारो भएकोले यहाँको विकास र जनताको सेवाका लागि आफ्नो तर्फबाट हुने पहलमा कमी नहुने विश्वास दिलाए ।
नेकपा संयोजक प्रचण्ड रुकुम पश्चिम र आफ्नो निर्वाचन क्षेत्र रुकुम पूर्वको जिल्ला स्तरीय बैठकलाई प्रशिक्षण दिन वैशाख १६ गते रुकुम पुगेका थिए ।
तर, बिहिबार रुकुमकोटबाट रोल्पाको जलजला जाँदै गरेको जिप दुर्घटना हुँदा पूर्व निर्धारित कार्यक्रम स्थगित गरेर शोकमा रहेका परिवारलाई भेटघाट गरी प्रचण्ड आज मात्रै रुकुम पश्चिम फर्किएका थिए । प्रचण्डको आइतबार बिहान रुकुमबाट काठमाडौँ जाने कार्यतालिका रहेको नेकपा रुकुम पश्चिमले जानकारी दिएको छ ।
