रुकुम पश्चिम -१७, वैशाख ।
नेपाली कम्युनिष्ट पार्टीका संयोजक तथा पूर्व प्रधानमन्त्री पुष्पकमल दाहाल प्रचण्डले सदन छलेर ल्याउन लागिएको अध्यादेश लोकतन्त्रका विरुद्ध रहेको बताउनुभएको छ । (नेकपा) रुकुम पश्चिमले आज मुसिकोटमा आयोजना गरेको पत्रकार भेटघाटमा बोल्दै सरकारले बोलाइसकेको सदनको अधिवेशन रोकेर अध्यादेशको बाटो अपनाउनु लोकतन्त्र र संवैधानिक मान्यताका विरुद्ध रहेको बताउनुभएको हो ।
सरकारले अपनाएको अलोकतान्त्रिक विधिले संविधानको मर्मलाई नै प्रहार गर्ने भएकाले यस्तो गल्ती नगर्न सरकारलाई सचेत गराएको संयोजक प्रचण्डको भनाइ छ । “अब अहिले त राष्ट्रपतिकोमा गएर बसेको छ त्यो अध्यादेश, अब के हुन्छ हेर्न बाँकी छ, तै पनि हामीले यसलाई परम्पराका विरुद्ध र अलोकतान्त्रिक भनेका छौं, प्रचण्डले भन्नुभयो ।”
त्यस्तै संयोजक प्रचण्डले काठमाडौँ उपत्यकाको खोला किनार भित्रका सुकुम्बासी बस्ती हटाउने भन्दै कुनै योजना बिना सरकारले अहिले देशभर अभियान चलाएको आरोप लगाउनुभएको छ । सरकारले वास्तविक सुकुम्बासीको पहिचान र वैकल्पिक व्यवस्थापन नगरी गरिब निमुखा माथि बल प्रयोग गरिनु गलत रहेको उहाँको भनाइ छ ।
सुकुम्बासीलाई हटाउने नाममा प्रहरी, सशस्त्र प्रहरी र सेना नै परिचालन गरेर हजारौँ हजार परिवारलाई विचलित बनाइएकोले यसतर्फ सरकारको गम्भीर ध्यानाकर्षणका लागि पार्टीको तर्फबाट जोडदार माग गरिएको बताउनुभएको छ ।
यसैगरी अर्को एक फरक प्रसङ्गमा संयोजक प्रचण्डले नेपालमा बृहत कम्युनिष्ट सुदृढीकरणको आवश्यकता रहेको औँल्याउनुभयो । त्यसका लागि अबको विकल्प सबै कम्युनिष्ट घटकहरु एक ठाउँमा आउनुपर्ने उहाँको भनाई छ ।
त्यस्तै प्रचण्डले ५० प्रतिशत युवा पुस्तालाई पार्टी र संरचनागत जिम्मेवारीमा समेट्ने गरी पार्टीको कार्यदिशा निर्माण गरिएको बताउनुभएको छ ।
नेकपा रुकुम पश्चिमले बुधबार आयोजना गरेको पार्टीको विस्तारित बैठक तथा प्रशिक्षणमा सहभागी हुन आउनुभएका संयोजक प्रचण्ड आजै आफ्नो निर्वाचन क्षेत्र रुकुम पूर्व जानुभएको छ ।
