रुकुम पश्चिम -१२, चैत ।
रुकुम पूर्वमा निःशुल्क विशेषज्ञ मानसिक स्वास्थ्य शिविर सञ्चालन हुने भएको छ । सिस्ने गाउँपालिका, पुथा उत्तरगंगा गाउँपालिका र भूमे गाउँपालिकाको आयोजना तथा स्वास्थ्य सेवा कार्यालय र जिल्ला अस्पतालको समन्वयमा शिविर सञ्चालन गर्न लागिएको हो ।
शिविरमा नेपाल जनजागरण मञ्च र युएमएन कर्णाली प्रदेश (सुर्खेत क्लस्टर) को आर्थिक तथा प्राविधिक सहयोग रहने जागरण मञ्चले बताएको छ ।
मानसिक स्वास्थ्य समस्या भएका व्यक्तिहरूका लागि विशेषज्ञ चिकित्सकद्वारा निःशुल्क सेवा प्रदान गरिने भएकाले शिविरमा सहभागी भई मौकाको लाभ लिन सबैलाई अनुरोध गरिएको छ ।
मञ्चका अध्यक्ष टेक बहादुर कुसारीका अनुसार शिविर चैत १७ गते सिस्ने गाउँपालिका स्थित पुरानो सभाहल, रुकुमकोटमा सञ्चालन हुनेछ । त्यसैगरी चैत १८ र १९ गते पुथा उत्तरगंगा गाउँपालिका -१०, तकमा शिविर सञ्चालन गरिनेछ । शिविर बिहान ८ बजेदेखि बेलुका ५ बजेसम्म सञ्चालन हुनेछ ।
शिविरमा मानसिक स्वास्थ्य जाँच सेवा, मनोसामाजिक परामर्श, निःशुल्क औषधि वितरण तथा सामान्य स्वास्थ्य परीक्षण गरिनेछ ।
दिक्क लाग्ने, निराशा महसुस हुने, अत्यधिक रिस उठ्ने, अल्छी लाग्ने, बेचैनी हुने, टाउको वा शरीर दुख्ने, निर्णय लिन कठिनाइ हुने, शरीर झमझमाउने, भविष्यप्रति चिन्ता वा नकारात्मक सोच आउने, सामाजिक गतिविधिबाट टाढा रहने, केही गर्न नसकिने जस्तो लाग्ने, एक्लै बस्न रुचाउने, खाना मन नलाग्ने, डर लाग्ने, हातखुट्टा सिल्का हान्ने जस्ता समस्या भएका व्यक्तिलाई विशेष प्राथमिकताका साथ जाँच गरिने छ ।
