रुकुम पश्चिम -९, चैत ।

फागुन २१ गते सम्पन्न प्रतिनिधि सभा सदस्य निर्वाचनका उम्मेदवार चन्द्रबहादुर बुढाले आज आफ्नो चुनावी खर्च सार्वजनिक गरेका छन् । नेकपा (माओवादी) बाट उम्मेदवार बनेका बुढाले प्रतिनिधि सभा सदस्य निर्वाचन ऐन, २०७४ को दफा ७२ अनुसार निर्वाचन खर्च सार्वजनिक गरेका हुन् ।

उनले सार्वजनिक गरेको निर्वाचन खर्च तीन लाख ४५ हजार मात्रै रहेको छ । उम्मेदवार बुढाले आफ्नो निर्वाचन खर्च सातवटा शीर्षकमा गरेका छन् । जसमध्ये सबैभन्दा धेरै यातायात खर्च डिजेल सहित एक लाख ४३ हजार र सबैभन्दा कम मतदाता नामावली खरिदमा तीन हजार खर्च गरिएको छ ।

बुढाले प्रतिनिधि सभा सदस्य निर्वाचनमा भएको उक्त खर्च विवरण जिल्ला निर्वाचन कार्यालय रुकुम पश्चिमलाई बुझाइ सकिएको जानकारी दिएका छन् ।

निर्वाचन आयोगले निर्वाचन परिणाम घोषणा भएको मितिले पैँतीस दिनभित्र निर्वाचन खर्च विवरण पेश गरी निर्वाचन (कसुर तथा सजाय) ऐन २०७३ को दफा ३१ को उपदफा (२) बमोजिम खर्चको विवरण सार्वजनिक गर्नुपर्ने कानुनी व्यवस्था छ ।

यदि निर्वाचन खर्चको विवरण नबुझाए वा सार्वजनिक नगरे आयोगले निर्वाचन (कसुर तथा सजाय) ऐन, २०७३ को दफा ३१ बमोजिम सम्बन्धित पार्टी र उम्मेदवारलाई कारबाही गर्दछ ।