रुकुम पश्चिम -१९, फागुन ।
यही फागुन २१ गते हुने प्रतिनिधि सभा सदस्य निर्वाचन आउन अब मात्र दुई दिन बाँकी छ । निर्वाचनका लागि देशैभरका मतदानस्थलमा मतदान अधिकृत सहित दुई लाख १५ हजार कर्मचारीको टोली पुगिसकेको छ ।
यस पटकको निर्वाचनमा १ करोड ८९ लाख ३ हजार ६ सय ८९ मतदाता मतदानका लागि योग्य रहेको निर्वाचन आयोगले बताएको छ । तर निर्वाचनको दिनमा मतदाताले मतदान गर्न जाँदा केही कुरामा भने ध्यान दिनुपर्ने छ ।
जस अन्तर्गत मतदाताले आफ्नो मतदाता परिचयपत्र वा नेपाली नागरिकताको प्रमाणपत्र साथमै लिएर मतदान केन्द्रमा जानुपर्ने छ ।
त्यस्तै राष्ट्रिय परिचयपत्र, राहदानी वा जग्गाधनी प्रमाणपुर्जा वा सवारी चालक अनुमतिपत्र पनि मतदानका निम्ति मान्य हुने आयोगको भनाई छ ।
आयोगका अनुसार फागुन २० गतेसम्म १८ वर्ष उमेर पूरा भएका मतदाताले निर्वाचनमा तोकिएको मतदान केन्द्रमा गई मतदान गर्न पाउनेछन् ।
