रुकुम पश्चिम -१२, फागुन ।
रुकुम पश्चिमको नेपाली काङ्ग्रेसले फागुन २१ गते हुने प्रतिनिधि सभा सदस्य निर्वाचनलाई लक्षित गरेर प्रतिज्ञा पत्र सार्वजनिक गरेको छ । पार्टी कार्यालय मुसिकोटमा आज बिहान पत्रकार सम्मेलनको आयोजना गरी प्रतिज्ञा पत्र सार्वजनिक गरेको हो ।
प्रतिज्ञा पत्र सार्वजनिक गर्दै कांग्रेस उम्मेदवार राजु केसीले राजनीतिक शुद्धिकरण र प्रविधि मैत्री शिक्षा देखि पर्यावरण संरक्षणको कबुल गरेका छन् । उनले आफ्नो संकल्प पत्रमा रुकुम पश्चिम समृद्धिको सुनिश्चितताका लागि संक्षिप्तमा १४ वटा मुख्य प्रतिबद्धताहरू प्रस्तुत गरेका छन् ।
जसअनुरूप राजनीतिलाई फोहोरी खेल भन्ने भ्रम चिर्न शुद्धिकरण र सुधारको कुरालाई प्रमुख संकल्पको रूपमा राखिएको छ । जिल्लाको तीव्र विकासका लागि मौलिक विकास नीति, सुशासन र भ्रष्टाचार नियन्त्रण तथा आधुनिक र प्रविधिमैत्री शिक्षा लागू गर्न पहलका कुरा उक्त पत्रमा समावेश गरिएको छ ।
त्यस्तै स्वास्थ्यमा सबैको पहुँच, मर्यादित कृषि र सम्मानित किसान, पर्यटन जडीबुटी र पूर्वाधार, बसाईसराई नियन्त्रण, सुरक्षित सडक एवं भौतिक पूर्वाधार, बिजुली पानी र सफा वातावरणमा सुनिश्चित गरिने संकल्प गरिएको छ ।
उम्मेदवार केसीको प्रतिज्ञा पत्रमा सबै स्थानीय तहमा ग्रामीण स्टोर्स, व्यावसायिक सिँचाइ प्रणाली, युवा सशक्तिकरण र करियर काउन्सिलिङ तथा जलवायु अनुकूल र पर्यावरण संरक्षणलाई प्राथमिकतामा राखिने बताइएको छ ।
यिनै प्रतिबद्धतालाई आत्मसाथ गर्दै उम्मेदवार केसीले निर्वाचन पछिको आफ्नो संसदीय यात्रा सुरु भएमा कार्यान्वयन गर्ने संकल्प समेत गरेका छन् ।
नेपाली कांग्रेस रुकुम पश्चिमले यसपटक सिंगो पार्टी एक ढिक्काका साथ अगाडि बढेकाले फागुन २१ पछिको जित सुनिश्चित भएको दाबी गरेको छ ।
