रुकुम पश्चिम -११, माघ ।
रुकुम पश्चिम आइपुगेका प्रहरी नायब उपरीक्षक डिएसपी बेद बहादुर पौडेलले जिल्लाको शान्ति सुरक्षा र अपराध नियन्त्रणमा प्रहरीको मुख्य भूमिका रहने विश्वास व्यक्त गरेका छन् । प्रहरी प्रमुखको रूपमा जिम्मेवारी सम्हालेका डिएसपी पौडेलले आज पत्रकार भेटघाट मार्फत शान्ति सुरक्षा र अमनचयनको वातावरण निर्माण तथा अपराध नियन्त्रण र रोकथाम न्यूनीकरणमा ध्यान दिने बताए ।
नागरिकको सुरक्षामा सधैँ प्रहरी प्रतिबद्ध हुने भएकाले आफ्नो नेतृत्वमा रहेको प्रहरी नागरिककै हितमा लागिपर्ने डिएसपी पौडेलको भनाइ छ । नागरिक र समुदायका लागि प्रहरीको स्रोत साधन र क्षमताले भ्याएसम्म कानुनको परिधिभित्र रहेर प्रहरीले काम गर्ने उनले बताए ।
जिल्लाको लागू पदार्थ दुर्व्यसनी र अवैध कारोबारमा निगरानी तथा सीमा सुरक्षामा समेत कडाई गर्ने डिएसपी पौडेलले पत्रकारसँगको भेटमा जानकारी दिए । त्यस्तै सञ्चारकर्मी तथा पत्रकारको सुझाव अनुसार आगामी निर्वाचन र आफ्नो कार्यकालको अवधिभर सञ्चारमैत्री ढंगले सूचना सम्प्रेषणमा कमी हुन नदिने बताए ।
आगामी फागुन २१ गतेको निर्वाचनलाई भयरहित र स्वतन्त्र रूपमा सम्पन्न गर्न सबै सरोकारवालासँग प्रहरी प्रशासन प्रतिबद्ध भएर लाग्ने डिएसपी पौडेलको भनाई छ ।
