काठमाडौँ -२४ भदौ
भ्रष्टाचारविरुद्ध सडकमा उत्रिएको युवा समूह ‘Gen-Z नेपाल’ ले राष्ट्रिय स्वतन्त्र पार्टी (रास्वपा) का सभापति रवि लामिछानेसँग आफ्नो आन्दोलन कुनै पनि प्रकारले नजोडिएको स्पष्ट पारेको छ ।
मंगलबार साँझ सार्वजनिक गरिएको विज्ञप्तिमा समूहले लामिछानेको गिरफ्तारी वा सम्भावित रिहाइसम्बन्धी कुनै पनि कार्यक्रम आफ्नो एजेन्डा वा आन्दोलनसँग सम्बन्धित नभएको उल्लेख गरेको छ ।
विज्ञप्तिमा भनिएको छ, “हामी स्पष्ट पार्न चाहन्छौं कि श्री रवि लामिछाने (स्वतन्त्र पार्टीका नेता) हाम्रो एजेन्डा वा आन्दोलनको हिस्सा होइनन् । उहाँलाई रिहा गर्ने कार्यक्रम हामीसँग सम्बन्धित छैन, त्यसैले त्यसको जिम्मेवारी हामी लिँदैनौं ।”
Gen-Z ले लामिछानेको प्रसंगलाई आफ्नो आन्दोलनसँग जोडेर भ्रम सिर्जना गर्न खोजिएको गुनासो गर्दै त्यसलाई अस्वीकार गरेको छ । समूहले भ्रष्टाचारविरुद्धको आन्दोलनलाई “शुद्ध, स्वतन्त्र र गैर–राजनीतिक” राख्ने अडान दोहोर्याएको छ ।
