काठमाडौँ -२४, भदौ ।

प्रधानमन्त्री केपी शर्मा ओलीले आन्दोलनरत पक्षलाई वार्ता र संवादमा आउन आग्रह गर्नुभएको छ । सोमबारदेखि देशको राजधानी लगायत विभिन्न ठाउँमा भइरहेको प्रदर्शनलाई समाधान गर्न वार्ता र संवादमा आउन आग्रह गर्नुभएको हो ।

प्रधानमन्त्री ओलीले कुनैपनि रुपको हिंसा राष्ट्रको हितमा नहुने र शान्तिपूर्ण तथा संवादको माध्यमबाट समाधान खोज्ने परिपाटी अपनाउनुपर्ने बताउनुभएको छ ।

त्यसका लागि उत्पन्न परिस्थितिको मूल्याङ्कन गर्न र सार्थक निस्कर्षको लागि संबद्ध पक्षसँग संवादमा रहेको समेत जानकारी गराउनुभएको छ । साथै आज साँझ ६ बजे सर्वदलीय बैठक आव्हान गरेकोले विषम परिपिस्थतिमा संयम रहन विनम्र अनुरोध गरिएको छ ।

प्रधानमन्त्री ओलीले हिजो राजधानी र देशको विभिन्न भागमा भएको प्रदर्शन र त्यसपछिको घटनाप्रति दुःख व्यक्त गर्नुभएको छ ।