रुकुम पश्चिम, -१९, भदौ
नेपाल पत्रकार महासंघ कर्णाली प्रदेश समितिको दोस्रो पूर्ण बैठक अध्यक्ष विष्णु प्रसाद शर्माको अध्यक्षतामा सम्पन्न भएको छ । सम्पन्न बैठकले विभिन्न विषयमा छलफल गर्दै महत्वपूर्ण निर्णयहरू गरेको छ ।
बैठकले हालसम्मको प्रगतिलाई समीक्षा गर्दै महासंघका गतिविधिहरूमा सहयोग पुर्याउने सम्पूर्ण निकायप्रति धन्यवाद ज्ञापन गरेको छ ।
साथै, महासंघको कामलाई छिटो, छरितो, व्यवस्थित र प्रभावकारी बनाउन ६ विभागीय संयोजक तोकिएको छ । संगठन विभागमा खगेन्द्र भट्टराई, अनुशासन विभागमा लक्ष्मण केसी, पत्रकार महिला विभागमा अप्सरा बिष्ट, आर्थिक विभागमा ईश्वरराज अधिकारी, प्रकाशन तथा प्रचार–प्रसार विभागमा विष्णुप्रसाद न्यौपाने र पत्रकार हित तथा आचारसंहिता अनुगमन विभागमा अशोक राजी संयोजक तोकिएका छन् ।
बैठकले आगामी कार्यकालको २५ बुँदे कार्ययोजना स्वीकृत गरेको छ । नयाँ सदस्यता प्रदान गर्ने र सदस्यता नवीकरणका लागि २०८२ कार्तिक मसान्तसम्म समयसीमा तोक्दै जिल्ला शाखाहरुलाई पत्राचार गर्ने निर्णय गरिएको छ ।
त्यसैगरी कर्णाली प्रदेशका मिडियाको अवस्था अध्ययन गर्ने, मिडिया दिगोपन र सुशासनका लागि सरोकारवाला निकायसँग सहकार्य गर्दै कार्यक्रम सञ्चालन गर्ने निर्णय पनि बैठकले गरेको छ ।
सञ्चार क्षेत्र र श्रमजीवी पत्रकारका समस्या समाधान, सेवा सुविधा व्यवस्थापन तथा प्रेस र अभिव्यक्ति स्वतन्त्रता प्रवर्द्धनका लागि प्रदेश तथा स्थानीय सरकारसँग पहल, संवाद, सहकार्य र खबरदारी गर्ने निर्णय बैठकले गरेको छ ।
सञ्चारसम्बन्धी कानुन निर्माण गर्दा पत्रकार महासंघसहित सरोकारवालासँग अनिवार्य राय–सुझाव लिने वातावरण सुनिश्चित गर्न आग्रह गरिएको छ।
यस्तै, महासंघ कर्णाली प्रदेश समितिको नेतृत्वमा सूचना केन्द्र स्थापना गर्ने र ‘कर्णाली मिडिया सम्मेलन–२०८२’ आयोजना गर्ने निर्णय गरिएको छ । साथै, महासंघको सूचना अधिकारीका रूपमा उपाध्यक्ष लक्ष्मण केसीलाई तोकिएको छ ।
