रुकुम पश्चिम -२३, चैत ।

रुकुम पश्चिम प्रहरीले पाँच रोपनीमा लगाइएको अफिम नष्ट गरेको छ । जिल्लाको आठविसकोट नगरपालिका वडानम्बर -१२, ठुलीबार्खुमा लगाइएको लागू पदार्थ अफिम नष्ट गरेको हो ।

जिल्ला प्रहरी कार्यालयका अनुसार प्रहरी निरीक्षक गणेश पाण्डेको कमाण्डमा खटिएको १० जनाको टोलीले ठुलीबार्खुका विभिन्न आठ स्थानमा गैरकानुनी रूपमा लगाइएको अफिमका बोटहरू पूर्ण रूपमा नष्ट गरेको छ ।

चैत २२ गतेदेखि वडानम्बर १२ कै झिनचौरबाट ठुलीबार्खु, लामपुजा हुँदै वडानम्बर -१३, को घेत्मा स्थित मैराजे र भल्मसम्मको पैदल यात्रा सम्पन्न गरिएको प्रहरीले बताएको छ ।

सो यात्राको क्रममा शान्ति सुरक्षा र अपराधिक गतिविधि नियन्त्रण सम्बन्धी स्थानीयसँग अन्तरक्रिया गरिएको छ । त्यस्तै जनप्रतिनिधिबाट सुझाव राय सङ्कलन गरिएको प्रहरीको भनाइ छ ।