रुकुम पश्चिम -१६, चैत ।

प्रधानमन्त्री कप पुरुष एकदिवसीय राष्ट्रिय क्रीकेट प्रतियोगिताको उपाधि नेपाल पुलिस क्लबले जितेको छ । भैरहवा रङ्गशालामा आज भएको फाइनल खेलमा त्रिभुवन आर्मी क्लबलाई ६ विकेटले पराजित गर्दै पुलिसले उपाधि जितेको हो ।

पुलिसले एकसय ५५ रनको टार्गेट २५ दशमलव २ ओभरमा पूरा गर्दै उपाधि जित हासिल गर्न सफल भयो । उपविजेता बनेको त्रिभुवन आर्मी क्लबले ४३ ओभरमा अल आउट हुँदै एकसय ५४ रन मात्रै बनाउन सक्यो ।

फागुन २५ गतेबाट सुरु भएको पिएम कपमा सात प्रदेश र तीन विभागीय टिमको सहभागिता रहेको थियो ।

यस पटकको प्रधानमन्त्री कप पुरुष एकदिवसीय राष्ट्रिय क्रीकेट प्रतियोगितामा ललित नारायण राजवंशी सर्वोत्कृष्ट खेलाडी घोषित भए । उनले खेल अवधिभर ४१ विकेट हात पारे ।