रुकुम पश्चिम -१३, फागुन ।

रुकुम पश्चिमको चौरजहारीमा चौथो बृहत चौरजहारी कृषि, पर्यटन, व्यापार तथा सांस्कृतिक महोत्सव लाग्ने भएको छ । यही फागुन २२ देखि चैत ४ गते सम्म महोत्सव लाग्ने आयोजक सहिद स्मृति कला संस्कृति संरक्षण केन्द्रले बताएको छ ।

‘कला, संस्कृति, कृषि, उद्योग व्यापार, चौहरजहारी नगरपालिका समृद्धिको आधार’ भन्ने मूल अभियानका साथ महाेत्सव सञ्चालन गरिने निर्देशक एल बि कटुवालले जानकारी दिए । उक्त महोत्सव चौरजहारी नगरपालिका -२, को रङ्गशालामा आयोजना गरिने भएको छ ।

महोत्सवमा नायक पल शाह लगायत राष्ट्रिय स्तरका चर्चित कलाकारको उपस्थिति रहने आयोजकले बताएको छ । महाेत्सवमा एकसय २० वटा स्टल राखिने भएको छ । यसपटकको महोत्सवमा स्थानीय व्यापारीलाई सहुलियतमा स्टल उपलब्ध गराइने छ ।

सहिद स्मृति कला संस्कृति संरक्षण केन्द्रका लागि सामग्री खरिद तथा संस्थागत विकासका लागि महोत्सव लगाइने बताइएको छ ।

चौथो बृहत चौरजहारी महोत्सव आयोजनाको विषयमा आज मुसिकोट खलङ्गामा पत्रकार सम्मेलन गरी जानकारी गराइएको हो ।