रुकुम पश्चिम २, माघ ।

राप्ती लोकमार्ग अन्तर्गत रुकुम पश्चिममा पर्ने पितिवाङ खोला पुल निर्माणको कामले तीव्रता पाएको छ । विगत चार वर्षदेखि अलपत्र अवस्थामा रहेको पितिवाङ खोलाको पुल यसै वर्षको चैतमा सक्ने गरी निर्माण कार्य अगाडि बढाइएको हो ।

सडक डिभिजन कार्यालय चौरजहारीका डिभिजन प्रमुख तेजस्वी शर्माका अनुसार हालसम्म उक्त मोटरेवल पुलको ३५ प्रतिशत काम पूरा भएको छ । आगामी चैत महीना सम्म मात्रै पुल निर्माणको अन्तिम म्याद थप भएकाले हाल निर्माणाधीन पुलको काम धमाधम भइरहेको शर्माको भनाइ छ । उक्त मोटरेवल पुल निर्माणका लागि करिब पाँच करोड २८ लाख लागत रहेको बताइएको छ ।

यसअघि निर्माण कम्पनीको लापर्बाहीका कारण पितिवाङ खोलाको पुल निर्माण लथालिङ्ग अवस्थामा रहेको थियो । तर नागरिकको चौतर्फी दबावले गत महिनादेखि अलपत्र पुलको काम ढिला गरी सुरु गरिएको छ ।

दाङ-रुकुम सडक संजाल जोडिएको दुई दशक बितिसक्दा पनि पितिबाङ खोलामा अहिलेसम्म पक्की मोटरेबल पुल बन्न सकेको छैन । जसका कारण यस क्षेत्रका नागरिक र सवारी साधनले पटक पटक सास्ती व्यहोर्नुपर्ने बाध्यता छ ।