रुकुम पश्चिम -१५, जेठ ।
आज १९ औं गणतन्त्र दिवस विभिन्न कार्यक्रम आयोजना गरेर मनाइँदैछ । निरङ्कुश राजतन्त्रको अन्त्य गरी सङ्घीय लोकतान्त्रिक गणतन्त्र घोषणा भएको ऐतिहासिक उपलक्ष्यमा गणतन्त्र दिवस मनाइँदैछ ।
विसं २०६५ जेठ १५ गते जननिर्वाचित संविधानसभाको पहिलो बैठकद्वारा २ सय ४० वर्षदेखि नेपालमा कायम रहेको राजतन्त्र अन्त्य गरिएको थियो ।
जेठ १५ गतेकै दिन नेपाली जनतालाई स्वतन्त्रता, उदार सामाजिक न्यायसहितको समावेशी समानुपातिक लोकतान्त्रिक गणतन्त्र सहित नागरिक सर्वोच्चता प्राप्त भएको थियो । गणतन्त्र दिवस वंशीयतन्त्रलाई जनताले जितेको उत्सव पनि मानिन्छ ।
तत्कालीन सात राजनीतिक दलले निरङ्कुश राजतन्त्रकाविरुद्ध आह्वान गरेको शान्तिपूर्ण जनआन्दोलन र विद्रोही नेपाल कम्युनिष्ट पार्टी (माओवादी) ले गरेको सशस्त्र सङ्घर्षका उपलब्धिका रूपमा देशले गणतन्त्रको अभ्यास गरेको १९ वर्ष भएको छ ।
नागरिकका समस्या शिक्षा, स्वास्थ्य, सार्वजनिक यातायात, सामाजिक सुरक्षाको प्रत्याभूतिसहित गरिबीको अन्त्यसँगै विश्वमञ्चमा नेपाल र नेपालीको प्रतिष्ठालाई उँचो बनाउन पर्ने लोकतान्त्रिक गणतन्त्रको प्रथम कार्यभार रहेको छ ।
यसैबीच आज रुकुम पश्चिममा पनि विभिन्न कार्यक्रम गरेर गणतन्त्र दिवस मनाइँदै छ । मुसिकोट खलङ्गामा अहिले बिहान ७ बजे प्रभात फेरि कार्यक्रम सुरु गरेर बालमन्दिरमा अन्तरक्रिया तथा सभा गरिने भएको छ ।
त्यस्तै जिल्लाका सबै पालिकामा पनि आज गणतन्त्र दिवसको अवसरमा विविध कार्यक्रम गरी १९ औं गणतन्त्र दिवस मनाइँदै छ ।
