रुकुम पश्चिम – ३१, वैशाख ।
रुकुम पश्चिममा दल त्यागका कारण १४ जना जनप्रतिनिधिको स्वतः पद रिक्त भएको छ । निर्वाचन आयोग नेपालले आज निकालेको सूचना अनुसार एकैसाथ दल त्याग गरेका १४ जना निर्वाचित प्रतिनिधिको पद रिक्त भएको हो ।
पद रिक्त हुनेमा आठविसकोट नगरपालिका उपप्रमुख धनकुमारी शाही, वडानम्बर -१० का वडा अध्यक्ष गणेश कुमार शाह र १३ का वडा अध्यक्ष टेकबहादुर थापा रहेका छन् ।
त्यस्तै चौरजहारी नगरपालिका वडानम्बर -१०, का वडा अध्यक्ष वीरेन्द्र रोकाय वडानम्बर -५, का खुम बहादुर खड्का, वडानम्बर -११, का तुल्से ओली र वडानम्बर -३, का लालबहादुर बुढाको अध्यक्ष पद रिक्त भएको छ ।
दल त्यागले पद रिक्त हुनेमा चौरजहारी नगरपालिकाका कार्यपालिका सदस्य देवेन्द्र सुनार, दलित महिला सदस्य चरदी कामी र भिमी सार्की तथा महिला सदस्य चन्द्रा बस्नेत रहेका छन् ।
मुसिकोट नगरपालिकाका कार्यपालिका सदस्य राजु बिक सहित जिल्ला समन्वय समिति सदस्य गीताकुमारी केसी र कृष्णबहादुर यरीको पनि दल त्यागका कारण स्वतः पद रिक्त भएको छ ।
राजनीतिक दल सम्बन्धी ऐन, २०७३ को दफा ३२ को उपदफा (१) र राजनीतिक दल सम्बन्धी नियमावली, २०७४ को नियम २२ बमोजिम दल त्याग गरेको व्यहोरा र कानूनी व्यवस्था बमोजिम जनप्रतिनिधिको पद रिक्त भएको बताइएको छ ।
पद रिक्त भएका जनप्रतिनिधिहरू नेपाली कम्युनिष्ट पार्टीको २०७९ सालको स्थानीय तहको निर्वाचनमा निर्वाचित भई हाल अन्य दलमा प्रवेश गरेको केन्द्रीय कार्य समितिको निर्णयको प्रतिलिपि र जानकारीका आधारमा आयोगले पद रिक्त भएको जनाएको छ ।
आयोगले पछिल्लो निर्णय गर्दै राजनीतिक दल सम्बन्धी नियमावली, २०७४ को नियम २२ को उपनियम (२) बमोजिम पद रिक्त भएको सूचना जारी गरेको हो ।
