रुकुम पश्चिम -३०, वैशाख ।
यस वर्षको माध्यमिक शिक्षा परीक्षा (एसईई) को नतिजामा रुकुम पश्चिम पहिलो भएको छ । कर्णाली प्रदेशका दश जिल्ला मध्य रुकुम पश्चिम पहिलो बनेको हो ।
शिक्षा विकास निर्देशनालयका अनुसार रुकुम पश्चिमबाट एसइईमा ७९ दशमलव ३४ प्रतिशत विद्यार्थी उत्तीर्ण भएका छन् । यो सँगै प्रदेशका नौ जिल्लालाई पछि पार्दै रुकुम पश्चिम धेरै विद्यार्थी उत्तीर्ण गराउने जिल्ला बनेको छ ।
एसइई नतिजामा मुगु जिल्ला ७५ दशमलव ९० प्रतिशत विद्यार्थी उत्तीर्ण गराउँदै दोस्रो भएको छ । कालिकोटले ७३ दशमलव १४ प्रतिशत विद्यार्थी उत्तीर्ण गराएर प्रदेशमा तेस्रो भएको छ ।
यसवर्ष एसईई नतिजामा सबैभन्दा कम दैलेखबाट ३१ दशमलव ८२ प्रतिशत विद्यार्थी उत्तीर्ण भएको शिक्षा विकास निर्देशनालयका सुर्खेतले बताएको छ ।
गतवर्षको एसईईमा कर्णाली प्रदेशमा जाजरकोटले ८२ दशमलव ११ प्रतिशत विद्यार्थी उत्तीर्ण गराउँदै पहिलो भएको थियो ।
यस वर्षको माध्यमिक शिक्षा परीक्षा एसईईमा देशैभरबाट ६५ दशमलव ९८ विद्यार्थी उत्तीर्ण भएका थिए ।
गत चैत १९ देखि २९ गतेसम्म सञ्चालन भएको एसइईमा यसपटक परीक्षा केन्द्रमा नै उत्तरपुस्तिका परीक्षण गरिएकाले छिटो नतिजा सार्वजनिक भएको हो ।
यसवर्ष एसईई परीक्षामा ५ लाख १२ हजार ४ सय २१ जना विद्यार्थीले फारम भरेका थिए । नियमिततर्फ चार लाख ४१ हजार ५६६ जनाले र ग्रेड वृद्धितर्फ ७० हजार ८५५ जनाले परीक्षाका लागि फारम भरेका थिए ।
