रुकुम पश्चिम -२८, चैत ।
नयाँ वर्षको अवसरमा मुसिकोट नगरपालिका -८, घोरखानीमा आजदेखि विविध खेलकुद तथा सांस्कृतिक कार्यक्रम सुरु भएको छ । श्री तीन बहिनी युवा क्लबको आयोजनामा प्रतियोगिताका रूपमा खेलकुद तथा सांस्कृतिक कार्यक्रम सुरु भएको हो ।
क्लबका उपाध्यक्ष जय बहादुर ओलीका अनुसार क्लबको तेस्रो वार्षिकोत्सव तथा नयाँ वर्ष २०८३ को उपलक्ष्यमा खेलकुद सहित सांस्कृतिक कार्यक्रम आज उद्घाटन भएको छ । कार्यक्रमको उद्घाटन मुसिकोट नगर प्रमुख महेन्द्र केसीले गरेका हुन् ।
उद्घाटन कार्यक्रमका प्रमुख अतिथि रहेका केसीले खेलकुद क्षेत्रको विकासका लागि नगरपालिकाले सबै विद्यालय र वडापालिकामा सकेजतिको लगानी गर्दै आइरहेको बताए । उनले बजेट अनुसार पालिकाको केही स्थानमा ठूला खेलकुद प्रतियोगिता सञ्चालन गर्ने गरी रङ्गशाला निर्माणका काम पनि अगाडि बढेको जानकारी दिए ।
यहाँको तीन बहिनी युवा क्लबले यसपटक प्रतियोगिताको रूपमा वडा स्तरीय पुरुष भलिबल, खुल्ला रस्साक्सी (पुरुष/महिला), एकल नृत्य र घैँटो फोर प्रतियोगिता राखेको छ ।
यसपटक भलिबलतर्फ २८ टिमले प्रतियोगितामा टिम दर्ता गराएका छन् ।
भलिबलतर्फ प्रथम पुरस्कार ५१ हजार सहित कप, मेडल र प्रमाणपत्र, द्वितीय पुरस्कार २८ हजार सहित कप, मेडल र प्रमाणपत्र तथा सान्त्वना पुरस्कार दुई टिमलाई १५ हजार सहित कप, मेडल र प्रमाणपत्र प्रदान गरिने बताइएको छ ।
त्यस्तै एकल नृत्यतर्फ प्रमाणपत्र सहित प्रथम पुरस्कार २ हजार, द्वितीय पुरस्कार १५ सय र तृतीय पुरस्कार एक हजार तोकिएको छ ।
खुल्ला रस्साकसीका लागि प्रमाणपत्र सहित प्रथम पुरस्कार २ हजार, द्वितीय पुरस्कार १ हजार पाँचसय र तृतीय पुरस्कार १ हजार प्रदान गरिने आयोजकले बताएको छ ।
कार्यक्रममा घैँटोफोर प्रतियोगितातर्फ विजेता पुरस्कार १ हजार र प्रमाणपत्रको व्यवस्था गरिएको छ ।
आयोजक तीन बहिनी युवा क्लबले विविध खेलकुद तथा सांस्कृतिक प्रतियोगितामा प्रदान गरिने पुरस्कार राशिबाट २५ प्रतिशत कर कट्टी गरिने बताएको छ ।
८ नम्बर वडा कार्यालय संरक्षक रहेको खेलकुद प्रतियोगिता तथा सांस्कृतिक कार्यक्रममा आमा समूह, टोल समूह युवा क्लब तथा विशेष झाँकीलाई उचित पुरस्कारले सम्मान गरिने भएको छ ।
आजदेखि सुरु भएको खेलकुद प्रतियोगिता तथा सांस्कृतिक कार्यक्रम वैशाख १ गते विशेष मेलाको आयोजना गरेर समापन गरिने आयोजकले जनाएको छ ।
