रुकुम पश्चिम -१७, चैत ।

नेकपा एमालेले पूर्व प्रधानमन्त्री एवं पार्टी अध्यक्ष केपी शर्मा ओली तथा पूर्व गृहमन्त्री रमेश लेखकको गिरफ्तारीलाई लिएर आन्दोलनका कार्यक्रम तय गरेको छ । आज बसेको एमाले सचिवालय बैठकले प्रतिशोधपूर्ण र बदला-प्रेरित गिरफ्तारी विरुद्ध आन्दोलनका कार्यक्रम सार्वजनिक गरेको हो ।

एमालेले सार्वजनिक गरेको आन्दोलनका कार्यक्रम अन्तर्गत चैत २५ गतेसम्म जिल्ला तहमा आन्दोलन केन्द्रित बृहत भेला गर्ने बताएको छ ।

चैत २८ गते सबै पालिकामा विरोध प्रदर्शन, वैशाख ३ गते वडा तहमा भेला, वैशाख ७ गते प्रदेश राजधानीहरूमा प्रदर्शन र वैशाख १२ गते राजधानीमा विशाल विरोध प्रदर्शन गर्ने कार्यक्रम तय गरेको छ ।

त्यस्तै सर्वपक्षीय नागरिक संवादका लागि उपाध्यक्ष रघुजी पन्त, उपमहासचिव योगेश भट्टराई र केन्द्रीय सदस्य मीन बहादुर शाही लाई जिम्मेवारी दिइएको एमालेले बताएको छ । संसदभित्र दलहरूसँग सहकार्य र प्रभावकारी प्रस्तुति गर्ने जिम्मेवारी उपाध्यक्ष राम बहादुर थापा बादल र सचिव पद्मा अर्याललाई दिएको छ । जसका लागि बुधबार ३ बजे संसदीय दलको बैठक पार्टी कार्यालयमा बस्ने निर्णय गरेको छ ।

साथै एमालेले आन्दोलनका थप कार्यक्रम तय गर्न तत्कालै पार्टी केन्द्रीय कमिटीको बैठक बोलाउने निर्णय समेत गरेको छ । बैठकले पार्टीद्वारा घोषित आन्दोलनलाई प्रभावकारी बनाउन विद्यार्थी तथा पेशागत जनसंगठनहरूलाई पनि आन्दोलनका कार्यक्रम सञ्चालन गर्न निर्देशन दिएको छ ।

नेकपा एमालेको सचिवालय बैठकले केपी ओली र लेखकको गिरफ्तारी पछि भएको शान्तिपूर्ण आन्दोलनमाथि सरकारले प्रहरी मार्फत गरेको दमनको घोर भर्त्सना समेत गरेको छ ।