रुकुम पश्चिम -२५, असोज ।
नेपाल जनजागरण मञ्च रुकुम पश्चिमको वार्षिक साधारण सभा तथा वार्षिक समीक्षा कार्यक्रम आज सम्पन्न भएको छ । मुसिकोटमा आयोजित मञ्चको २०औं वार्षिक साधारण सभा तथा समीक्षा कार्यक्रम भव्य रूपमा सम्पन्न भएको हो ।
जनजागरण मञ्चका अध्यक्ष तथा साधारण सभाका अध्यक्ष टेक बहादुर कुसारीको अध्यक्षता तथा जिल्ला समन्वय समितिका उपप्रमुख देव बहादुर बिकको प्रमुख आतिथ्यतामा वार्षिक साधारण सभा सम्पन्न भएको छ ।
साधारण सभामा जनजागरण मञ्चले रुकुम पश्चिम र रुकुम पूर्वमा सञ्चालित परियोजनाहरूको गतिविधि प्रस्तुत गर्दै सामाजिक लेखा परीक्षण मार्फत वर्षभरि गरिएका काम कारबाही तथा कार्यक्रमको सन्दर्भमा जानकारी गराएको छ ।
साधारण सभाका प्रमुख अतिथि देव बहादुर बिकले जनजागरण मञ्चले रुकुम पश्चिमको कृषि, शिक्षा, स्वास्थ्य लगायत विभिन्न क्षेत्रमा संस्थाले गर्दै आइरहेको कामको प्रशंसा गरेका छन् । समाज परिवर्तनका लागि गैरसरकारी संस्थाको महत्वपूर्ण भूमिका हुने भएकाले जिल्लामा जनजागरण मञ्च लगायत सबै सङ्घ संस्थाको योगदानलाई उनले कदर गरेका छन् ।
वार्षिक साधारण सभाको सन्दर्भमा उक्त संस्थाले केही विद्यार्थीहरूलाई पुरस्कारको रूपमा शैक्षिक सामग्री प्रदान गरेको छ । त्यस्तै संस्थाका उत्कृष्ट कर्मचारी र मिडिया मार्फत जनजागरण मञ्चका गतिविधिहरूलाई प्रचारप्रसार गर्ने सञ्चारकर्मीलाई पनि सम्मान गरिएको छ ।
कार्यक्रमको सञ्चालन संस्थाका सहसचिव दिपेन्द्र महताराले गरेका थिए ।
