काठमाडौं -२१, भदौ ।
तेह्रौँ ‘पीपी प्रसाई राष्ट्रिय शिक्षक पुरस्कार–२०८३’ अन्तर्गत कर्णाली प्रदेशका उत्कृष्ट शिक्षकका रूपमा सुर्खेतस्थित त्रिपुरेश्वर माध्यमिक विद्यालयका विज्ञान शिक्षक लोकेन्द्र चन्द सम्मानित भएका छन् ।
शनिबार काठमाडौंमा सम्पन्न कार्यक्रममा नेपालका प्रथम राष्ट्रपति डा. रामवरण यादवले चन्दलाई प्रमाणपत्र सहित नगद ५० हजार रुपैयाँ प्रदान गर्दै सम्मान गर्नुभएको छ ।
सार्वजनिक विद्यालयमा विशिष्ट योगदान पुर्याउने उत्कृष्ट शिक्षकलाई प्रदान गरिँदै आएको उक्त पुरस्कार अन्तर्गत चन्दलाई शिक्षा क्षेत्रमा पुर्याएको योगदान तथा विज्ञान र प्रविधि शिक्षाको प्रवर्द्धनमा गरेको कामका आधारमा कर्णाली प्रदेशको उत्कृष्ट शिक्षकका रूपमा छनोट गरिएको हो ।
सम्मानपछि चन्दले यो उपलब्धिले आफ्नो शिक्षण यात्रामा थप ऊर्जा, जिम्मेवारी र समर्पणको भावना बढाएको बताए । उनले आगामी दिनमा अझ सिर्जनशील, इमानदार र जिम्मेवार भएर विद्यालय, विद्यार्थी, समुदाय तथा विज्ञान–प्रविधिको क्षेत्रमा निरन्तर योगदान गर्ने प्रतिबद्धता व्यक्त गरेका छन् ।
‘पीपी प्रसाई फाउन्डेसन’ले सामुदायिक विद्यालयमा कार्यरत शिक्षकलाई प्रोत्साहन तथा सम्मान गर्ने उद्देश्यले हरेक वर्ष उत्कृष्ट शिक्षकलाई उक्त पुरस्कार प्रदान गर्दै आएको छ ।
पर्यटन व्यवसायी प्रजापति प्रसाईंको ग्रामीण क्षेत्रसम्म शिक्षा र पर्यटनको विकास गर्ने सपनालाई मूर्तरूप दिन २०६७ साल फागुन ६ गते ‘पीपी प्रसाई फाउन्डेसन’ स्थापना गरिएको थियो । प्रसाईंको २०५६ साल भदौ १९ गते दहचोकमा भएको हवाई दुर्घटनामा परी निधन भएको थियो ।
