रुकुम पश्चिम -११, भदौ ।
कर्णाली प्रदेश सरकारको उद्योग, पर्यटन, वन तथा वातावरण मन्त्रीमा कल्याणी खड्का नवनियुक्त मन्त्रीको रुपमा नियुक्त हुनुभएको छ । आज मात्रै मन्त्रीको रुपमा नियुक्त हुनुभएको खड्काको छोटो राजनीतिक चिनारी तल उल्लेख गरिएको छ ।
रुकुम पश्चिम साविक कोटजहरी गाविस वडानम्बर -१, हाल चौरजहारी नगरपालिका -९, मा विक्रम सम्वत् २०३४ साल फागुन ११ गते बुवा नरबहादुर खड्का र आमा जानुका देवी खड्काको कोखबाट कल्याणी खड्काको जन्मनुभएको हो । विद्यालय तहमा पढ्दै गर्दा २०४६ सालदेखि विद्यार्थी राजनीतिमा लाग्दै उहाँ अनेरास्ववियु कोटजहारी निमाविको प्रारम्भिक कमिटीमा आबद्ध हुनुभएको थियो ।
त्यसपछि २०५३ सालमा अनेमसंघ जिल्ला कमिटी र सोही वर्ष इलाका नम्बर ११ चौरजहारीको सहसंयोजक हुँदै पुनः अनेमसंघ सचिव भएर २०५८ सालमा नेकपा एमालेबाट पार्टी सदस्यता प्राप्त गर्नुभयो ।
पार्टी र संगठनमा महत्त्वपूर्ण जिम्मेवारी निर्वाह गर्नुभएको खड्काले २०६६ मा पार्टीको जिल्ला कमिटी सदस्य हुँदै सचिवालय सदस्यको रुपमा जिम्मेवारी पूरा गरेको अनुभव छ ।
उहाँले पुनः २०६९ साल देखि अनेमसंघको जिल्ला अध्यक्षको महत्त्वपूर्ण जिम्मेवारी निर्वाह गर्नुभयो ।
स्नातक तह सम्मको अध्ययन पूरा गर्नुभएको खड्का २०७८ मा तत्कालीन नेकपा एकीकृत समाजवादीको जिल्ला उपाध्यक्ष र कर्णाली प्रदेश सदस्य हुँदै २०७९ मा कर्णाली प्रदेश सभा सदस्य हुनुभयो ।
रुकुम पश्चिमबाट समानुपातिक सांसदको रुपमा कर्णाली प्रदेश सभा सदस्य भई प्रदेश मामिला समितिको सभापतिमा समेत कुशल जिम्मेवारी निर्वाह गरिरहेको अवस्थामा २०८३ साल भदौ ११ गते नेकपाबाट कर्णाली प्रदेश सरकारको उद्योग, पर्यटन, वन तथा वातावरण मन्त्रीमा उहाँ नियुक्त हुनुभयो ।
