रुकुम पश्चिम -२५, साउन ।

रुकुम पश्चिमको छुट्टाछुट्टै स्थानमा चार जनालाई विषालु सर्पले टोकेको छ । जिल्लाको चौरजहारी नगरपालिकाका दुईजना र सानीभेरी गाउँपालिकाका दुई जनालाई विषालु सर्पले टोकेको हो ।

जिल्ला प्रहरी कार्यालयका प्रहरी निरीक्षक तथा सूचना अधिकारी झबिन्द्र परियारका अनुसार आइतबार र आज गरेर चार जनालाई विषालु सर्पले टोकेको छ । सर्पले सानीभेरी गाउँपालिका वडानम्बर -२, गिठाकोट बस्ने अन्दाजी २२ वर्षकी कोपिला महतारालाई आफ्नै घर नजिकको खेतबारीमा घाँस काट्ने क्रममा नाम नखुलेको सर्पले बायाँ हातमा टोकेको छ । सोही गाउँपालिका वडानम्बर -३, ज्यामिरे बस्ने अन्दाजी बर्ष २५ की अमृता बिष्टलाई पनि आफ्नै घर कोठामा सुतिरहेको अबस्थामा नाम नखुलेको सर्पले टोकेको प्रहरीले बताएको छ ।

त्यस्तै चौरजहारी नगरपालिका वडानम्बर -८, चिप्लेटी बस्ने अन्दाजी बर्ष २३ की दिपा विकलाई आफ्नै घर नजिकको खेतबारीमा हिँड्ने क्रममा नाम नखुलेको सर्पले दाहिने खुट्टामा टोकेको छ । प्रहरीले जनाए अनुसार सोही पालिकाको चौरजहारी नगरपालिका वडानम्बर -१, लामीछाने गाउँ बस्ने अन्दाजी बर्ष २९ की कमला विकलाई माईती घर कुमाख गाउँपालिका -४ सल्यानमा घाँस काट्ने क्रममा नाम नखुलेको सर्पले बाँया खुट्टामा टोकेको छ ।

विषालु सर्पले टोकेर घाइते भएका बिरामीको हाल कर्णाली प्रदेश प्रादेशिक अस्पताल कालागाउँ र मेहलकुना अस्पताल सुर्खेतमा उपचार भइरहेको छ । प्रहरीले घटना सम्बन्धमा थप अनुसन्धान कार्य भईरहेको र वर्षात् र गर्मी समयमा सर्पको बिगबिगी हुने भएकोले सुरक्षा सहितको सावधानी अपनाउन अनुरोध गरेको छ ।