रुकुम पश्चिम -२५, साउन ।
रुकुम पूर्वको रुकुमकोटमा मानसिक स्वास्थ्य सम्बन्धी पैरवी बैठक आइतबार सम्पन्न भएको छ । स्वास्थ्य सेवा कार्यालय रुकुम पूर्वको आयोजनामा बैठक सम्पन्न भएको हो ।
बैठकमा नेपाल जनजागरण मञ्च रुकुमले जिल्लामा सञ्चालन गरेको मानसिक स्वास्थ्यसम्बन्धी गतिविधि तथा हालसम्मको प्रगति विवरण प्रस्तुत गरिएको छ । युनाइटेड मिसन टू नेपाल र नेपाल जनजागरण मञ्च रुकुमको आर्थिक सहयोगमा सञ्चालन भएका गतिविधिका विषयमा जानकारी गरिएको हो ।
नेपाल जनजागरण मञ्चले सिस्ने पुथा उत्तरगंगा गाउँपालिकाका ३ सय ६ जनालाई मानसिक स्वास्थ्यसम्बन्धी सेवा प्रदान गरेको बताएको छ ।
त्यस्तै जिल्लाका २८ जना महिला र ४३ जना पुरुष गरी ७१ जना मानसिक स्वास्थ्य समस्या भएका व्यक्तिले मनोचिकित्सक तथा मनोविदबाट प्रत्यक्ष सेवा लिएको जनाइएको छ ।
बैठकबाट मानसिक स्वास्थ्य तथा बालविवाह न्यूनीकरणका लागि आगामी भदौ १ गते देखि एकसय दिने अभियान सञ्चालन गर्ने निर्णय गरिएको छ ।
