रुकुम पश्चिम -३२, असार ।
कर्णाली प्रदेश सरकारका मुख्यमन्त्री यामलाल कँडेल विरुद्ध अविश्वासको प्रस्ताव पेश भएको छ । प्रदेश सभाका १६ जना सभा सदस्यले मुख्यमन्त्री विरुद्ध आज अविश्वासको प्रस्ताव पेश गरेका हुन् ।
प्रदेश सदस्यहरूले नेपालको संविधानको धारा १८८ को उपधारा (४) तथा कर्णाली प्रदेश सभा नियमावली, २०८१ नियम १५२ को उपनियम (२) बमोजिम लिखित रुपमा अविश्वासको प्रस्ताव पेश गरेका छन् । साथै, नेपालको संविधानको धारा १८८ को उपधारा (५) बमोजिम कर्णाली प्रदेश सरकारको मुख्यमन्त्री पदका लागि कर्णाली प्रदेशसभाका माननीय सदस्य जीवनबहादुर शाहीलाई प्रस्तावित समेत गरेका छन् ।
अविश्वास प्रस्ताव पेश गरेका सभा सदस्यहरुले कर्णाली प्रदेश सभा नियमावली, २०८१ नियम १५२ को उपनियम (३) बमोजिमको आवश्यक प्रक्रियाको लागि आगामी सभाको बैठकको कार्यसूचीमा समावेश गरी छलफल गराउने व्यवस्थाका लागि प्रदेश सभा सचिवालयलाई अनुरोध समेत गरेका छन् ।
मुख्यमन्त्री कँडेल विरुद्ध अविश्वास प्रस्ताव गर्नेमा नेपाली कांग्रेस र नेकपाका प्रदेश सभा सदस्य रहेका छन् । अविश्वासको प्रस्तावसँगै कर्णाली प्रदेश सरकार फेरबदल हुने देखिएको छ ।
