रुकुम पश्चिम -३०, असार ।

रुकुम पश्चिमको त्रिवेणी गाउँपालिका वडानम्बर -९, नुवाकोट डाँडाका २४ वर्षीय मृगौला पीडित पिताराम परियारको आर्थिक अवस्था कमजोर हुँदा उपचारमा समस्या भएको छ । हप्तामा दुईपटक डायलासिस गर्नुपर्ने भएकाले उपचारमा समस्या भएको उनको परिवारले बताएको छ ।

गएको जेठ महिनादेखि दुवै मृगौलाबाट पीडित परियारको डायलासिस गर्दै आइरहेकाले सम्पूर्ण मनकारी व्यक्तिमा परिवारले आर्थिक सहयोगको अपिल गरेको छ । परिवारको जेठो छोराको अवस्था नै जीवनको कठिन अवस्थामा संघर्षरत भएकाले सानो रकम भएपनि सहयोग गरिदिन उनको परिवारको भनाइ छ ।

दुईवटै मृगौलाबाट पीडित परियारको तीनजना नाबालक समेत साथमा भएकाले आर्थिक अवस्थामा थप जटिलता देखिएको छ । जेठ महिनादेखि दाङ, नेपालगञ्ज हुँदै काठमाडौँ सम्म पुगेर उपचार गराउँदा घरमा भएको सबै रकम सकिएको परियारको बुवाले बताए ।

छोराको उपचारका लागि अहिलेसम्म पाँच लाख भन्दा बढी रकम सकिएको बताइएको छ । घरको सबै जिम्मेवारी बोकेको छोराको अवस्था नै हाल दयनीय हुँदा सिङ्गो परिवार चिन्तामा रहेको छ ।