रुकुम पश्चिम -२७, असार ।
एकादेशमा एक वीर प्रतापी राजा थिए । उनी निकै दुरदर्शि र ज्ञानी पनि थिए । उनलाई साथ दिने रानी थिइन् । उनका एकदमै आकर्षक सुन्दरी एक्ली छोरी राजकुमारी थिइन् । सुखी दरबार थियो । त्यहाँका जनताहरु पनि दरबारको चालचलन देखी खुसी थिए ।
राजा फुर्सदको बेला यसो रमाइलो गर्न घना जङ्गलतिर शिकार गर्न जान्थे । उनले शिकार गरेर दरबार ल्याउँथे र भान्सेलाई दिन्थे । भान्सेले मिठो परिकार बनाएर राजपरिवारलाई दिन्थ्यो । उनिहरु मिठो मानेर खान्थे ।
त्यस्तै रानी र राजकुमारी दरबारको समिपमै भएको सुन्दर बगैंचातिर घुमफिर गरि रमाउने गर्थे । यसरी दरबारको दिनचर्या चलेको थियो ।
एकदिनको कुरा हो, राजा आफ्ना जनताहरुलाई भेटघाट गर्न जनताहरुको घरदैलोतिर गएका थिए । त्यसैबेला एकजना फिरन्ते ज्योतिष दरबारको गेटनिर आइपुग्यो । गेटका सुरक्षा गार्डसंग दरबार भित्र जान दिन अनुरोध गर्यो । सुरक्षा गार्डले तपाई किन दरबार भित्र जाने हो, कारण सोधे ।
फिरन्ते ज्योतिषले भन्यो, “मैले राजकुमारीको भाग्यरेखा हेर्नुपर्ने हुन्छ ।” त्यही भएर जाने हो । उसले भनेपछि, सुरक्षा गार्ड सँगै दररबार भित्र प्रवेश गरे ।
रानी र राजकुमारी दरबारकै बगैंचातिर बसेर कविता पढिरहेका थिए । त्यहीँनिर फिरन्ते ज्योतिष गएर रानी र राजकुमारीलाई प्रणाम गर्यो । रानीले हसिलो मुहारमा प्रणाम दर्शन गर्दै, “ज्योतिष तिमीलाई दरबारमा स्वागत छ ।” भन्दै के कति कामले यहाँ आयौं ? भनिन् ।
फिरन्ते ज्योतिषले भन्यो, “रानीसाइब, राजकुमारीको भाग्यरेखा कस्तो होला?” भनेर हेर्न म यहाँ आएको हुँ । उसको कुरा सुनेपछि रानीले ए हो ठिक छ । राजकुमारीको हात हेरिदेउ न भनेपछि राजकुमारीले हात देखाइन् । फिरन्ते ज्योतिषले हात हेरिदिन थाल्यो ।
उसले हात हेर्दै भन्यो, ल रानीसाइब राजकुमारीको त आयु एकदम कम रहेछ । त्यतिबेलै राजकुमारीले हात तानिन् । रानी दु:खी चेहरामा देखिन्, राजकुमारी निराश भइन् । फिरन्ते ज्योतिष दान दक्षिणा लिएर दरबारबाट बाहिर गयो ।
राजा जनताहरुलाई भेटघाट सकेर दरबारमा आए । दरबारमा रानीलाई चिन्तित र राजकुमारीलाई निराश अनि दुखी भएको देखे । राजा एकक्षण, के भएको होला भनेर उत्सुक भए र रानीलाई सोधे । रानी के भयो तिमीहरूलाई ? रानीले जवाफ दिइन्, अगाडि ज्योतिष आएको थियो । उसले हाम्री राजकुमारीको हात हात हेर्यो ।”
राजकुमारीको आयु कम रहेछ भन्यो । राजा पलमै हाँसे हा….हा । रानी आजभन्दा केही बर्ष पहिले मलाई पनि ज्योतिषले कम आयु छ भनेको थियो । अहिलेसम्म केही भएको छैन । जे हुन्छ विधाताको भरोसा ।
ज्योतिषको कुरा अन्धविश्वासी थियो । हाम्री राजकुमारीलाई केही हुँदैन । आफ्ना बुवाको कुरा सुनेपछि राजकुमारी छ्क्कै परिन् । साँच्चै म भ्रममा थिएँ क्या हो भन्दै खुसी भइन् ।
