रुकुम पश्चिम -१५, असार ।
रुकुम पश्चिममा आज यस वर्षको २३ औं राष्ट्रिय धान दिवस विविध कार्यक्रमको आयोजना गरी मनाइएको छ । “जलवायुमैत्री प्रविधि, धानमा आत्मनिर्भरता र समृद्धि” भन्ने मूल नाराका साथ मुसिकोट नगरपालिकाको ट्याखोलामा धान दिवस मनाइएको हो ।
कृषि विकास कार्यालयको आयोजनामा मनाइएको धान दिवसमा किसानको खेतमै पुगेर धान रोपाइँ गरिएको छ । रोपाइँ संगै खेतमै पुरुष र महिलातर्फ रस्साकस्सी (डोरीतान्ने) र दौड प्रतियोगिता आयोजना सम्पन्न गरिएको छ ।
प्रतियोगितामा प्रथम, द्वितीय र तृतीय हुनेलाई नगद पुरस्कार प्रदान गरिएको कृषि विकास कार्यालयले बताएको छ ।
आजको धान दिवस उद्घाटनमा बोल्दै जिल्ला समन्वय समितिका प्रमुख लुम्बिनी गौतमले जिल्लामा उत्पादकत्व बढाउन समयमै किसानलाई मल, बिउ र किटनाशक औषधि उपलब्ध गराउनुपर्ने बताउनुभएको छ ।
धान दिवस कार्यक्रममा जिल्लाका सरोकारवाला निकायका प्रमुख तथा प्रतिनिधि, पत्रकार लगायतको उपस्थिति रहेको थियो ।
रुकुम पश्चिम जिल्लाको कुल क्षेत्रफल १ लाख २१ हजार दुईसय हेक्टरमध्ये २९ प्रतिशत खेतीयोग्य जमिन रहेको छ । उक्त खेतियोग्य जमिनको ४७.५ प्रतिशत जमिनमा खेती भैरहेको छ ।
हालसम्म यस जिल्लाको धान खेती हुने क्षेत्रफलको करिब ३५ प्रतिशत रोपाइँ भएको अनुमान गरिएको छ । चालु आर्थिक वर्ष ८२/८३ मा यस जिल्लामा धानको उत्पादकत्व ४.२८ मेट्रिकटन/हेक्टर रहेको कृषि विकास कार्यालयको भनाइ छ ।
