रुकुम पश्चिम -११, असार ।
रुकुम पश्चिमको आठविसकोट नगरपालिका र करार स्वास्थ्यकर्मी बिच चार बुँदे सहमति भएको छ । आठविसकोट नगर अस्पताल र स्वास्थ्यकर्मी बिच आज भएको छलफलबाट चार बुँदे सहमति भएको हो ।
नगरपालिकाले जनाए अनुसार उक्त सहमतिपछि सामूहिक राजीनामा दिएका ३६ जना करार स्वास्थ्यकर्मी आ-आफ्नो नियमित कामकाजमा फर्किने भएका छन् । सहमति पत्रमा स्वास्थ्यकर्मीले हाल खाइपाई आएको तलब भत्ता यथावत राख्ने र कार्यालय समय बाहेक अतिरिक्त समय कार्य गरेमा एकदिन बराबर अतिरिक्त हुन गएको समयलाई एकदिनको समय मानि हाल खाइपाई आएको रकममा वृद्धि गरी नगर करार तहको तलब अनुसार अतिरिक्त सेवा भत्ता प्रदान गरिने भएको छ ।
त्यस्तै प्रयोगशाला र एक्स-रे विभागमा कार्यरत स्वास्थ्यकर्मीलाई दिँदै आएको २० प्रतिशत जोखिम भत्तालाई वृद्धि गरी २५ प्रतिशत बनाइने भएको छ ।
यसबाहेक नगरपालिकाबाट निर्मित करार स्वास्थ्यकर्मी र करार कर्मचारी नियुक्त गर्ने र हाल लागु भएका कार्यविधिहरु समायानुकूल परिमार्जन तथा संशोधन गर्न कार्यदल गठन गरी आवश्यक संशोधनको लागि नगर कार्यपालिकामा सिफारिस गर्ने सहमति भएको छ ।
सहमति पत्रमा नगरपालिकाको तर्फबाट निमित्त प्रमुख प्रशासकीय अधिकृत राजेश गौतम र करार स्वास्थ्यकर्मीको तर्फबाट कविराम सेर्पाली लगायत ६ जनाले हस्ताक्षर गरेका छन् ।
यहाँ कार्यरत करार स्वास्थ्यकर्मीले तलव भत्ता, अतिरिक्त सेवा भत्ता, जोखिम भत्ता लगायत अन्य सेवा वृद्धि गराउन माग राख्दै बुधबार सामूहिक राजीनामा दिएका थिए ।
