रुकुम पश्चिम -७, असार ।
रुकुम पश्चिमको त्रिवेणी गाउँपालिकालाई आइतबार पूर्णखोप सुनिश्चितता घोषणा गरिएको छ । त्रिवेणी गाउँपालिका स्वास्थ्य तथा सामाजिक विकास शाखाको आयोजनामा गाउँपालिकालाई पूर्णखोप सुनिश्चितता घोषणा गरिएको हो ।
राष्ट्रिय खोप सुनिश्चितता निर्देशिका अनुसार तोकिएको उमेर समूह भित्र पर्ने बालबालिकालाई सबै मात्राको खोप लगाइएकोले गाउँपालिकालाई पूर्ण खोप सुनिश्चितता तथा दिगोपना घोषणा गरिएको स्वास्थ्य तथा सामाजिक विकास शाखाले बताएको छ ।
जन्मेदेखि १५ महिना र १५ देखि ५९ महिनासम्मका त्रिवेणी गाउँपालिकाका बालबालिकालाई बीसीजी, डिपिटी, हेपाटाइटिस बी, पोलियो, पीसीभी, दादुरा-रुबेला लगायतको सबै मात्रा पूरा गरिएको छ ।
यसवर्ष त्रिवेणी गाउँपालिकालाई पूर्णखोप सुनिश्चितता गर्नका लागि पालिका भित्रका १५ महिनासम्मका ४ सय २६ बालबालिका र १५ देखि ५९ महिनासम्मका एकहजार एकसय ५१ जना बालबालिकालाई तोकिएको समयमा सबै मात्राको खोप पूरा गरिएको बताइएको छ ।
गत आर्थिक वर्ष ८१/८२ मा त्रिवेणी गाउँपालिकामा तीनसय ८ जना बालबालिकालाई खोप लगाइएकोमा चालु आर्थिक वर्ष ८२/८३ मा तीनसय २ जना बालबालिकालाई सबै मात्राको खोप लगाइएको छ ।
पालिकालाई पूर्णखोप सुनिश्चितता तथा दिगोपना घोषणा गर्न लक्षित उमेर समूहका बालबालिकाको जनभेटघाट तथा पहिचान, खोपको मात्रा र पूर्णता, घरधुरी सर्वेक्षण तथा प्रमाणीकरण र पालिकाको निर्णय तथा प्रतिबद्धता आवश्यक पर्दछ ।
