रुकुम पश्चिम -२८, जेठ ।
रुकुम पश्चिमको त्रिवेणी गाउँपालिकाबाट यसवर्ष करिब सात करोड रकमको कृषिजन्य वस्तु बिक्री गरिएको छ । पालिकाको दशवटै वडाका किसानले उत्पादन गरेको मसलाबाली, तरकारीबाली र फलफूलबाली अन्तर्गतका कृषिजन्य वस्तु बिक्री गरिएको हो ।
कृषि शाखाका कृषि अधिकृत रमेश पुन मगरले चालु आर्थिक वर्ष ८२/८३ मा सबैभन्दा बढी करिब पाँच करोड रकमको मसलाबाली निर्यात गरिएको बताए । पालिकामा १५ मेट्रिकटन अदुवा उत्पादन भएको र त्यसबाट ४ करोड ५० लाख रकम भित्रिएको छ ।
मसलाबालीमै पर्ने अलैचीबाट ३५ लाख रकम भित्रिएको र यो वर्ष पालिकाभर २० क्विन्टल अलैची उत्पादन भएको कृषि शाखाले बताएको छ ।
त्यस्तै २० हेक्टर क्षेत्रफलमा गरिएको तरकारीबाली सिमी, आलु, बन्दा र सागपातबाट ८० लाख रकम पालिकामा भित्रिएको बताइएको छ ।
फलफुलबाली अन्तर्गत यहाँ सुन्तला, कागती र किवी व्यावसायिक खेतीका रुपमा सञ्चालनमा रहेका छन् । यसवर्ष फलफूल बिक्रीबाट १ करोड रकम भित्रिएको कृषि शाखाले जनाएको छ ।
त्रिवेणी गाउँपालिकामा ३ हजार बढी हेक्टर अर्थात् ३७ प्रतिशत भूभागमा खेती हुँदै आइरहेको छ । जसअन्तर्गत तरकारी, मसला र फलफुलबाली सँगै अन्नबाली मुख्य खेतीको रूपमा रहेको छ ।
यहाँका किसानले अन्नबालीको रूपमा मकै, गहुँ, धान लगायतको खेती गर्दै आएका छन् । यस सङ्गै कृषिजन्य वस्तु उत्पादनका लागि त्रिवेणी गाउँपालिकाको हावापानी उपयुक्त मानिएकाले धेरैजसो किसान व्यावसायिक खेतीतर्फ आकर्षित भएका छन् ।
स्थानीय सरकारले पनि किसानलाई व्यावसायिक खेतीमा सघाउने गरी घरदैलो सेवा सहित मल, बिउ, किटनाशक औषधि लगायत अनुदानका कार्यक्रम दिँदै आइरहेको छ ।
