रुकुम पश्चिम -१८, जेठ ।
रुकुम पश्चिमको सानीभेरी गाउँपालिकाको अग्लो शिर मौराखारा लेकमा आइतबार ऐतिहासिक मौराखारा मेला भव्य रुपमा सम्पन्न भएको छ । जेठ पूर्णिमाको अवसरमा प्रसिद्ध मौराखारामा विविध खेलकुद प्रतियोगिता तथा सांस्कृतिक झाँकी सहित मेला सम्पन्न भएको हो ।
मौराखारा मेला व्यवस्थापन समितिले आयोजना गरेको उक्त मेलामा छेलो प्रतियोगितातर्फ सानीभेरी गाउँपालिका -३, का घनश्याम पुन प्रथम भएका छन् । प्रतियोगितामा आठवइसकोट नगरपालिका -१४, का राजेन्द्र बिटालु दोस्रो, सानीभेरी -४, का नवराज केसी तेस्रो र सानीभेरी -३, कै अर्जुन केसी सान्त्वना भएका छन् ।
छेलो प्रतियोगितातर्फ क्रमश प्रथम हुनेलाई १५ हजार, दोस्रोलाई १० हजार, तेस्रोलाई ६ हजार र सान्त्वना हुनेलाई ४ हजार पुरस्कार प्रदान गरिएको छ ।
छेलो प्रतियोगितामा २२ जनाले सहभागिता जनाएको बताइएको छ ।
त्यस्तै मेलामा लोक झाँकी तथा सांस्कृतिक समूहहरूले समेत आफ्ना प्रस्तुति राखेका थिए । आयोजक समितिका अनुसार सानीभेरी -३, भलाचौरको पैसेरु तथा सिँगारु सांस्कृतिक समूह, सानीभेरी -५ हाँसुको हाँसु सांस्कृतिक समूह, आठविसकोट -१४, को ज्यामिरकोट सांस्कृतिक समूहले सांस्कृतिक प्रस्तुति प्रस्तुत गरेका हुन् ।
मेलामा आठविसकोट -१४, कै उच्च शीतल पोखरी समूह, ठकुरी समाज पन्चेबाजा समूह, र सानीभेरी -६, कोटगाउँको झरना रमाइलो आमा समूहले पनि सांस्कृतिक प्रस्तुतिहरू राखेको बताइएको छ ।
मेलामा प्रस्तुत गरिएका सबै झाँकीलाई आकर्षक पुरस्कार प्रदान गरिएको मेला आयोजकले समितिले जनाएको छ ।
ऐतिहासिक मौराखारा मेलामा मौराखाराको प्राकृतिक सुन्दरता, धार्मिक तथा पर्यटकीय स्थलको समेत अवलोकन गरिएको छ ।
