रुकुम पश्चिम -९, वैशाख ।
रुकुम पश्चिमको मुसिकोटमा युवा मानव अधिकार रक्षकका सवालमा आज अन्तरक्रिया कार्यक्रम सम्पन्न भएको छ । ग्रामीणमुखी युवा अभियान नेपालको आयोजना तथा युवा मानव अधिकार रक्षक सञ्जाल रुकुम पश्चिमको समन्वयमा युवा मानव अधिकार रक्षक र निर्वाचित जनप्रतिनिधिबिच अन्तरक्रिया कार्यक्रम सम्पन्न भएको हो ।
कार्यक्रममा स्थानीय सरकारले युवा मानव अधिकार रक्षकको पक्षमा युवा लक्षित कार्यक्रम तथा बजेट निर्माण गर्नुपर्नेमा सहभागीले सुझाब दिएको आयोजकको भनाइ छ । युवालाई क्षमता अभिवृद्धि, सशक्तिकरण तथा रोजगारमूलक कार्यक्रममा जोड्नको लागि स्थानीय सरकारले नै आवश्यक पहल चाल्नुपर्ने निष्कर्ष निकालिएको छ ।
कार्यक्रमका प्रमुख अतिथि तथा प्रतिनिधि सभा सदस्य गोपाल शर्मा अनलले समेत सङ्घदेखि स्थानीय तहका सरकारले युवा मैत्री नीति तथा कार्यक्रम निर्माणमा जोड दिनुपर्ने बताए । यसतर्फ प्रत्येक वर्षको नीति तथा कार्यक्रममा युवाका आवश्यकतालाई उठान गर्न सक्ने गरी सरकारले विशेष ध्यान दिनुपर्ने उहाँको भनाइ छ ।
आइएनको आर्थिक सहयोग रहेको ग्रामीणमुखी युवा अभियान नेपालको अन्तरक्रिया कार्यक्रम सँगै जिल्ला स्थित युवा मानव अधिकार रक्षक सञ्जालका लागि कार्यक्रमका सहभागीले आगामी कार्ययोजना समेत निर्माण गरेका छन् । उक्त योजना मार्फत युवा लक्षित कार्यक्रम निर्माण गर्न स्थानीय सरकारसँग जोडिने र जिल्लाका सबै पालिकामा सञ्जाल गठन गर्ने निर्णय गरिएको छ ।
अन्तरक्रिया कार्यक्रममा आयोजक संस्था ग्रामीणमुखी युवा अभियान नेपाल कर्णाली प्रदेशका संयोजक सन्तोष बिकले संस्थाको विषयमा प्रस्तुतिकरण राखेका थिए । यस संस्थाले मानव अधिकार र सामाजिक न्याय, पर्यावरणीय न्याय, उत्थानशील समुदाय निर्माण, खाद्य अधिकार, सरसफाई, मानसिक स्वास्थ्य लगायत विविध क्षेत्रमा काम गर्दै आइरहेको छ ।
आजको अन्तरक्रिया कार्यक्रममा जिल्ला समन्वय समिति उपप्रमुख देवबहादुर बिकको विशेष आतिथ्यता रहेको थियो । त्यस्तै मुसिकोट नगरपालिकाका केही वडाका वडा अध्यक्ष, सरोकारवाला निकायका प्रतिनिधि, पत्रकार लगायतको उपस्थिति रहेको कार्यक्रमका अध्यक्ष तथा युवा मानव अधिकार रक्षक सञ्जालका कार्यवाहक अध्यक्ष रमेश मल्लले बताए ।
