रुकुम पश्चिम -२८, चैत ।
रुकुम पश्चिममा नेपाल रेडक्रसको सोसाइटीको नवनिर्मित भवन उद्घाटन गरिएको छ । एक कार्यक्रमको आयोजना गरी नवनिर्मित एकतले भवनको आज उद्घाटन गरिएको हो ।
नेपाल रेडक्रस सोसाइटीका केन्द्रीय सभापति बिनोद कुमार शर्माले रिबन काटेर भवन उद्घाटन गरेका हुन् । रुकुम पश्चिम जिल्ला शाखाको पचासौँ स्वर्ण जयन्ती तथा स्थापनाको अवसरमा नवनिर्मित भवन उद्घाटन गरिएको शाखाका सभापति बलवीर पुनले बताए ।
कुल ४३ लाख लागतमा निर्माण गरिएको भवनमा रेडक्रस केन्द्रीय शाखाको २५ लाख र बाँकी जिल्ला शाखाको आम्दानी स्रोत रहेको बताइएको छ ।
उक्त भवनमा एकवटा हल सहित कार्यालय सञ्चालनका लागि दुईवटा कोठा र अपाङ्ग मैत्री शौचालय निर्माण गरिएको छ ।
भवन उद्घाटन कार्यक्रममा केन्द्रीय सभापति शर्माको प्रमुख आतिथ्य तथा रेडक्रसका केन्द्रीय महामन्त्री मिनबहादुर मल्लको विशेष आतिथ्यता रहेको थियो ।
त्यस्तै मुसिकोट नगरप्रमुख महेन्द्र केसी र रेडक्रसका कर्णाली प्रदेश सभापति लिलाराम सुवेदी आतित्यता रहेको कार्यक्रममा विभिन्न सरोकारवाला निकायको समेत सहभागिता रहेको जनाइएको छ ।
नेपाल रेडक्रस सोसाइटीले मानवता, निष्पक्षता, तटस्थता, स्वाधीनता, स्वयंसेवक, एकता र विश्वव्यापकतालाई मूल सिद्धान्त र उद्देश्यका रूपमा ग्रहण गर्ने गरेको छ ।
नेपाल रेडक्रस सोसाइटी रुकुम शाखाको स्थापना २०३२ सालमा गेहेन्द्रबहादुर शाहको सभापतित्वमा तदर्थ समिति गठन गरिएको थियो ।
