रुकुम पश्चिम -२७, चैत ।
आठविसकोट नगरपालिका -१४, ज्यामिरकोट (टाकुरा) मा ३६औं पूर्णिमा मेला भव्य रूपमा सञ्चालन गरिने भएको छ । परम्परागत रूपमा सञ्चालन हुँदै आएको पूर्णिमा मेला विविध खेलकुद तथा सांस्कृतिक कार्यक्रम सहित भव्य रूपमा सञ्चालन गर्न लागिएको हो ।
“स्वास्थ्यका लागि खेल, राष्ट्रका लागि खेल” भन्ने मूल नाराका साथ वैशाख १६ गतेदेखि भलिबल प्रतियोगिता सहित पूर्णिमा मेलाको भव्य आयोजना गरिने आयोजकले बताएको छ । विविध खेलकुद तथा सांस्कृतिक कार्यक्रम सहित आयोजना गरिएको मेलामा खुल्ला शुद्ध वडा स्तरीय पुरुष भलिबल प्रतियोगिता राखिएको छ ।
प्रतियोगितामा प्रथम हुने टिमले ५० हजार रुपैयाँ सहित कप, मेडल र प्रमाणपत्र प्राप्त गर्नेछ । द्वितीय र तृतीय स्थान हासिल गर्नेले क्रमश ३५ हजार र २० हजार रुपैयाँ र पुरस्कार प्राप्त गर्ने पूर्णिमा मेला आयोजक समितिका अध्यक्ष धर्मराज मल्लले बताए ।
भलिबल प्रतियोगितामा सहभागिताका लागि दर्ता शुल्क ५ हजार रुपैयाँ तोकिएको छ । टिम दर्ताको अन्तिम समय वैशाख १५ गते बिहान १० बजेसम्म कायम गरिएको छ ।
उक्त मेलामा अन्य प्रतियोगिताको रुपमा घैँटो फोर, महिला रस्साकस्सी, भाले तान्ने लगायतका खेलहरू पनि समावेश गरिएको आयोजकले जनाएको छ । मेलामा एकल नृत्य, लोक दोहोरी, पञ्चेबाजा, मयूर नाच तथा स्थानीय झाँकी समेत प्रस्तुत गरिनेछ ।
