रुकुम पश्चिम -२३, चैत ।
कर्णाली प्रदेश सरकारका जलस्रोत तथा ऊर्जा विकास मन्त्री विजया बुढाले आवश्यकताका आधारमा योजना छनोट गर्न आग्रह गर्नुभएको छ । आइतबार युनिसेफ र रुकुमेली समाज विकास केन्द्रको साझेदारीमा सानीभेरी र मुसिकोटमा सम्पन्न परियोजनाको अवलोकन गर्न आउनुभएको मन्त्रीले स्थानीय सरकारले आवश्यकता अनुसार योजना छनोट गर्नुपर्ने बताउनुभएको हो ।
आगामी आर्थिक वर्षका लागि अहिले सबै सरकार बजेट निर्माणको चरणमा रहेकाले जनताका खास समस्यालाई मात्रै योजना बैंकमा समेट्नुपर्ने उहाँले बताउनुभएको छ । प्राथमिकताका आधारमा छनोट गरिएका योजनाले लक्षित समुदायलाई प्रत्यक्ष लाभ हुने र कार्यान्वयनमा समेत सहजता हुने भएकाले वडा तहदेखि नै योजना छनोटमा ध्यान दिनुपर्ने मन्त्री बुढाको भनाइ छ ।
भूकम्पपछि युनिसेफ र रुकुमेली समाज विकास केन्द्रको साझेदारीमा सानीभेरी -१ र मुसिकोट -१४ मा खानेपानी, सरसफाई र स्वच्छता सम्बन्धी विभिन्न परियोजनाहरू सञ्चालन गरिएका थिए । सोही सम्पन्न योजना अनुगमनको सिलसिलामा मन्त्री बुढाले गैरसरकारी सङ्घ संस्थाले सरकारलाई सघाउने गरी समुदाय स्तरमा गरेका कामको प्रशंसा गर्नुभएको छ ।
अनुगमनकै क्रममा मन्त्री बुढालाई लाभग्राही समुदाय र स्थानीय सरकारले प्रदेशको आगामी नीति, कार्यक्रम तथा बजेटमा खानेपानी र सिँचाइको दिगोपनालाई थप व्यवस्थापका लागि पहल गर्न अनुरोध गरेका छन् । सो, क्रममा उहाँले आगामी बजेटमा रुकुम पश्चिमका लागि आवश्यक योजना पहलमा मन्त्रालयको तर्फबाट आफूले विशेष ध्यान दिने बताउनुभएको छ ।
युनिसेफ र आरएसडिसीले २०८० कात्तिक ३० गतेको भूकम्पपछि सानीभेरीको चाइना बगरमा सरकारको एक घर एक धारा कार्यक्रम अनुसार ८० घरधुरी र सार्वजनिक स्थानमा चारवटा खानेपानीका धारा निर्माण गरेको छ । त्यस्तै मुसिकोट १४ को कुमाल गाउँमा समेत ६० घरधुरीलाई खानेपानी पुर्याइएको आरएसडिसीका कार्यकारी निर्देशक नरेन्द्र ओलीले बताए ।
भूकम्पपछि सानीभेरी र मुसिकोटमा युनिसेफ र आरएसडिसीको साझेदारी तथा प्रदेश र स्थानीय सरकारको समन्वयमा खानेपानी, सरसफाई र स्वच्छता सम्बन्धी विभिन्न कार्यक्रमहरू सम्पन्न गरिएको ओलीको भनाइ छ ।
