रुकुम पश्चिम -२०, चैत ।
रुकुम पूर्वमा सञ्चालित मानसिक स्वास्थ्य शिविर सम्पन्न भएको छ । सिस्ने गाउँपालिका, भूमे गाउँपालिका र पुथा उत्तरगंगा गाउँपालिकाको आयोजना तथा स्वास्थ्य सेवा कार्यालय र जिल्ला अस्पतालको समन्वयमा सञ्चालित तीन दिने शिविर सम्पन्न भएको हो ।
तीन दिनसम्म चलेको शिविरबाट ३ सय २ जनाले सेवा लिएको नेपाल जनजागरण मञ्चका अध्यक्ष टेक बहादुर कुसरीले जानकारी दिए । जसमध्ये सिस्ने गाउँपालिकामा १ सय ६ र पुथा उत्तरगंगा गाउँपालिकामा १ सय ९६ जनाले सेवा लिएका छन् ।
शिविरमा विशेषज्ञ मनोरोग चिकित्सकद्वारा मानसिक स्वास्थ्य समस्या भएका व्यक्तिलाई निःशुल्क परामर्श तथा उपचार सेवा प्रदान गरिएको छ । शिविरको मुख्य उद्देश्य मानसिक स्वास्थ्य समस्या भएका व्यक्तिको पहिचान गरी उनीहरूको स्वास्थ्यमा सुधार ल्याउनु रहेको छ ।
विशेषगरी चिन्ता, तनाव, उदासी, छारेरोग लगायत गम्भीर मानसिक स्वास्थ्य समस्या भएका सेवाग्राहीले सेवा लिएका छन् । सेवा लिएका मध्ये ७० प्रतिशत व्यक्तिमा मानसिक स्वास्थ्य समस्या भएको पाइएको छ ।
शिविरमा मानसिक स्वास्थ्य जाँच सेवा, मनोसामाजिक परामर्श, निःशुल्क औषधि वितरण तथा सामान्य स्वास्थ्य परीक्षण गरिएको बताइएको छ ।
शिविर जिल्लाको सिस्ने गाउँपालिकामा १७ गते र पुथा उत्तरगंगा गाउँपालिकामा १८ र १९ गते सञ्चालन गरिएको थियो ।
नेपाल जनजागरण मञ्च र युएमएन कर्णाली प्रदेश (सुर्खेत क्लस्टर) को आर्थिक तथा प्राविधिक सहयोगमा शिविर सञ्चालन गरिएको जनाइएको छ ।
