रुकुम पश्चिम -१८, चैत ।
निर्वाचन आयोग नेपालले पुनः मतदाता नामावली सङ्कलन तथा अद्यावधिक कार्यक्रम सुरु गर्न लागिएको बताएको छ । प्रतिनिधिसभा सदस्य निर्वाचन, २०८२ को सन्दर्भमा मङ्सिर ६ गतेदेखि स्थगन गरिएको मतदाता नामावली सङ्कलन तथा अद्यावधिक कार्यक्रम चैत २२ देखि पुनः सुरु गर्न लागेको हो ।
निर्वाचन आयोग, नेपालका सहसचिव एवं प्रवक्ता नारायण प्रसाद भट्टराईका अनुसार आज बसेको आयोगको बैठकले पुनः मतदाता नामावली सङ्कलन तथा अद्यावधिक कार्यक्रम सुरु गर्ने निर्णय गरेको छ । आयोगले राष्ट्रिय परिचयपत्र नम्बर प्राप्त गरेका नेपाली नागरिकले आफ्नो राष्ट्रिय परिचयपत्रको विवरण मार्फत मतदाता नामावलीमा अनलाइन प्रणालीबाटै नाम दर्ता गर्नसक्ने व्यवस्था मिलाएको छ ।
त्यस्तै राष्ट्रिय परिचयपत्र प्रणालीमा आवद्ध नभएका नेपाली नागरिकको हकमा आयोगको Pre-Enrollment प्रणाली मार्फत अनलाइन फाराम भरी आफ्नो फोटो तथा औंठा छाप सहितको जैविक विवरण दिन प्रदेश तथा जिल्ला निर्वाचन कार्यालयमा आवेदक स्वयम् भौतिक रूपमा उपस्थित हुनुपर्ने आयोगले बताएको छ ।
साथै मतदाता नामावलीमा रहेको त्रुटि सच्याउने एवं एकै वडाभित्र दुई वा सोभन्दा बढी मतदान स्थल रहेको भए मतदातालाई पायक पर्ने स्थानमा नाम सार्ने, दोहोरो नाम हटाउने, मृत्यु तथा बसाइँसराइको विवरण अद्यावधिक गर्ने लगायतका कार्यका लागि समेत अनलाइन माध्यमबाट आवेदन गर्न सकिने व्यवस्था मिलाइएको छ ।
