रुकुम पश्चिम -७, चैत ।
श्री इन्भेस्टमेन्ट एण्ड फाइनान्स कम्पनी लिमिटेड रुकुम पश्चिम शाखाले विद्यालयमा वित्तीय साक्षरता अभियान सुरु गरेको छ । अभियान अन्तर्गत शुक्रबार मुसिकोट नगरपालिका -१२, मा रहेको जनकल्याण माध्यमिक विद्यालय काँशपोखरीमा वित्तीय साक्षरता सम्बन्धी कार्यक्रम सम्पन्न गरेको हो ।
प्रशिक्षणका मुख्य प्रशिक्षक अभरण कुमार यादवले ग्लोबल मनी वीक २०२६ को अवसरमा स्मार्ट मनि टक्समा आधारित रहेर वित्तीय साक्षरता सम्बन्धी प्रशिक्षण दिएको कम्पनी लिमिटेडको रुकुम शाखाले बताएको छ ।
प्रशिक्षण कार्यक्रममा कुनै पनि व्यक्तिले आफ्नो आम्दानी, खर्च, बचत, ऋण, बीमा, लगानी र आर्थिक योजना जस्ता विषयमा छलफल गरिएको जनाइएको छ ।
स्मार्ट मनि टक्स प्रशिक्षणले हरेक व्यक्तिलाई सचेत र जिम्मेवार तथा आर्थिक व्यवहार अपनाउन प्रेरित गर्ने र अनावश्यक खर्च घटाउँदै भविष्यका लागि योजना बनाउने बानीको विकासमा सहयोग पुर्याउँदछ ।
त्यस्तै आजको डिजिटल युगमा बढ्दो अनलाइन ठगीलाई मध्यनजर गर्दै डिजिटल बैंकिङ, मोबाइल वालेट र साइबर सुरक्षा सम्बन्धि सचेत रहने विषयमा पनि प्रमुख प्रशिक्षक यादवले प्रशिक्षण दिएका थिए ।
विद्यालयमा अध्ययनरत कार्यक्रमका सहभागीले यस्तो कार्यक्रम वित्तीय ज्ञान अभिवृद्धि गर्न र दीर्घकालीन आर्थिक निर्णयमा सचेत बन्न सहयोग पुर्याउने बताएका छन् । यसबाट भविष्यमा कुनै पनि व्यक्ति आर्थिक रूपमा सक्षम नागरिक बन्नमा महत्वपूर्ण योगदान रहने आयोजक कम्पनी लिमिटेडले विश्वास व्यक्त गरेको छ ।
