रुकुम पश्चिम -५, चैत ।
चैत १९ गते देखि सुरु हुने माध्यमिक शिक्षा परीक्षा (एसइई) मा रुकुम पश्चिमबाट यस वर्ष करिब चार हजार विद्यार्थी सहभागी हुँदैछन् । जिल्लाका ७७ वटा सामुदायिक विद्यालय र पाँचवटा संस्थागत गरी ८२ वटा विद्यालयबाट ३ हजार ९ सय २७ विद्यार्थी (एसइई) मा सहभागी हुनेछन् ।
शिक्षा विकास तथा समन्वय इकाई प्रमुख तारा प्रकाश पुन मगरले जिल्लाका १६ वटा परीक्षा केन्द्रबाट यस वर्षको (एसइई) परीक्षा सञ्चालन हुने जानकारी दिएका छन् ।
जसअनुसार मुसिकोट नगरपालिकाको चारवटा परीक्षा केन्द्रबाट ८ सय ६४ जना, आठाबिसकोट नगरपालिकाको चारवटा परीक्षा केन्द्रबाट ८ सय ४९ जना र चौहरजहरी नगरपालिकाको दुईवटा परीक्षा केन्द्रबाट ८ सय ५ जना विद्यार्थी (एसइई) मा सहभागी हुनेछन् ।
त्यस्तै सानीभेरी गाउँपालिकाको दुईवटा परीक्षा केन्द्रबाट ५ सय ३४ जना, त्रिवेणी गाउँपालिकाको दुईवटा परीक्षा केन्द्रबाट ४ सय ४७ जना र बाँफिकोट गाउँपालिकाको दुईवटा परीक्षा केन्द्रबाट ४ सय २६ जना विद्यार्थी (एसइई) मा सहभागी हुने बताइएको छ ।
गतवर्ष चैत ७ गतेदेखि सुरु भएको (एसइई) परीक्षामा जिल्लाको १५ वटा परीक्षा केन्द्रबाट ३ हजार ६ सय ७० जना विद्यार्थी सहभागी भएका थिए । गत वर्षको तुलनामा यो वर्ष (एसइई) मा २ सय ५७ जना विद्यार्थी वृद्धि भएका छन् ।
शिक्षा विकास तथा समन्वय इकाइ कार्यालयले यस वर्ष आठविसकोट नगरपालिकाको नेपाल राष्ट्रिय माध्यमिक विद्यालय गत्तासैनामा परीक्षा केन्द्र थप गरिएसँगै १६ वटा परीक्षा केन्द्रबाट (एसइई) परीक्षा सञ्चालन हुने जनाएको छ ।
चैत १९ गतेदेखि सुरु हुने (एसइई) परीक्षा २९ गते सकिनेछ । यस वर्ष देशैभरबाट ५ लाख २० हजार विद्यार्थी (एसइई) परीक्षामा सहभागी हुने अनुमान गरिएको छ ।
