रुकुम पश्चिम -३, चैत ।

नेपाली काँग्रेसका केन्द्रीय सदस्य मान बहादुर नेपालीले नेपाली काँग्रेस पार्टी परित्यागको घोषणा गरेका छन् । सामाजिक सञ्जाल फेसबुक मार्फत आजदेखि नेपाली काँग्रेसमा नरहने घोषणा गर्दै पार्टी परित्याग गरेका हुन् ।

नेपालीले काँग्रेस पार्टी सभापति गगनकुमार थापालाई षड्यन्त्रको मुख्य नाइकेको आरोप लगाउँदै आफूले पार्टी छोडेको घोषणा गरेका छन् । उनले पार्टी त्यागको घोषणा गर्दै गर्दा गिरिजा प्रसाद कोइरालाको सहमति, सहकार्य र एकतालाई स्मरण गरेका छन् ।

साथै आफूमाथि भएको अन्याय नेपाली कांग्रेसभित्रको संस्कारमा नपर्ने भन्दै कांग्रेस पार्टीलाई ठूलो दुर्घटनामा अहिलेको पार्टी पंक्तिले पारेको उनको आरोप छ ।

नेता नेपालीले एउटा सामान्य परिवारबाट २०४८ सालदेखि काँग्रेस पार्टीमा आबद्ध भएर आफूले कुनै पनि निर्वाचनमा घात नगरेको बताएका छन् । नेपालीले यसपटकको निर्वाचनमा समेत पार्टीका उम्मेदवार राजु केसीलाई सघाउन सबै वडामा पुगेको बताउँदै आफ्ना कुनै पनि कमजोरी प्रमाणित गर्न चुनौती दिएका छन् ।

काँग्रेस रुकुम पश्चिमको पूर्व पार्टी सभापति समेत रहेका नेपालीलाई यसपटक समानुपातिक प्रणालीतर्फ दलितको पहिलो सूचीमा राखिएको थियो । तर सोमबार निर्वाचन आयोग नेपालले सार्वजनिक गरेको निर्वाचित समानुपातिक उम्मेदवारको सूचीमा नेपालीको नाम देखिएन ।

सोही सन्दर्भमा पार्टी पंक्तिबाटै नेपालीको नाम हटाइएको रुकुम काँग्रेसका केही नेतालाई आरोप लागेको छ ।

नेता नेपालीको काँग्रेस परित्यागले सिङ्गो नेपाली कांग्रेस र रुकुम पश्चिमलाई ठूलो झट्का लागेको छ ।