रुकुम पश्चिम -२, चैत ।

निर्वाचन आयोग नेपालले आज समानुपातिक निर्वाचन प्रणालीतर्फ उम्मेदवार निर्वाचित भएको नामावली सार्वजनिक गरेको छ । फागुन २१ गते सम्पन्न प्रतिनिधि सभा सदस्य निर्वाचनको समानुपातिक निर्वाचनमा दलहरूले प्राप्त गरेको मतका आधारमा समानुपातिक उम्मेदवारको नाम सार्वजनिक गरेको हो ।

निर्वाचन आयोगका अनुसार राजनीतिक दलबाट छनोट भएर आयोगमा सिफारिस भएका १ सय १० जना उम्मेदवारको नामावली घोषणा गरिएको छ । आयोगले सार्वजनिक गरेको नामावलीमा राष्ट्रिय स्वतन्त्र पार्टीबाट ५७ जना, कांग्रेसबाट २० जना, नेकपा एमालेबाट १६ जना, नेपाली कम्युनिष्ट पार्टीबाट ९ जना, श्रम संस्कृति पार्टीबाट चारजना र राष्ट्रिय प्रजातन्त्र पार्टीबाट चारजना उम्मेदवार रहेका छन् ।

आयोगले घोषणा गरेका ६ राजनीतिक दलबाट निर्वाचित सबै उम्मेदवारलाई चैत ५ गते प्रमाणपत्र वितरण गर्ने कार्यक्रम तय गरेको छ । निर्वाचित उम्मेदवारले प्रमाणपत्रका लागि मङ्गलबार निर्वाचन आयोगमा सकल नागरिकता र दुईप्रति फोटो कार्यालय समयमा उपलब्ध गराउन अनुरोध गरेको छ ।