रुकुम पश्चिम -७, फागुन ।
आज देशभर ७६ औँ ‘राष्ट्रिय प्रजातन्त्र दिवस’ विभिन्न कार्यक्रम आयोजना गरी मनाइँदै छ ।
नेपालको इतिहासमा जहानियाँ राणा शासनको अन्त्य भई प्रजातन्त्र स्थापना भएको गौरवपूर्ण र अविस्मरणीय दिनका रूपमा फागुन ७ गतेलाई दिवसको रुपमा मनाइन्छ ।
२००७ साल फागुन ७ गते प्रजातन्त्र स्थापना भएको दिन आज देशैभर विविध कार्यकम आयोजना गरी यो दिवस मनाइँदै छ ।
प्रजातन्त्र दिवसका अवसरमा आज राष्ट्रपति रामचन्द्र पौडेलले देश तथा विदेशमा बस्ने सम्पूर्ण नेपालीलाई शुभकामना सन्देश दिनुभएको छ । यसै अवसरमा यही फागुन २१ गते हुने प्रतिनिधि सभा सदस्यको निर्वाचनलाई सफल पार्न सबैको दायित्व भएकाले सम्पूर्ण दिदीबहिनी तथा दाजुभाइहरूमा हार्दिक अपिल समेत गर्नुभएको छ ।
प्रजातन्त्र दिवसको दिन आज काठमाडौंको सैनिक मञ्च टुँडिखेलमा मूल समारोहको कार्यक्रम हुनेछ । यसैबिच रुकुम पश्चिममा पनि विभिन्न कार्यक्रम गरी प्रजातन्त्र दिवस मनाइँदैछ ।
सरकारले प्रजातन्त्र दिवसका अवसरमा आज सार्वजनिक बिदा दिएको छ ।
