रुकुम पश्चिम -१४, माघ ।
नेकपा एमाले रुकुम पश्चिम र प्रगतिशील लोकतान्त्रिक पार्टीले बिहिबारदेखि एकैसाथ चुनावी प्रचारप्रसार अभियान थाल्ने भएका छन् । दुई पार्टीले आज मुसिकोटमा आयोजना गरेको संयुक्त पत्रकार सम्मेलन मार्फत प्रलोपा उम्मेदवारलाई जिताउन प्रचारप्रसार सुरु गर्ने भएका हुन् ।
चुनावी प्रचार प्रसारका लागि ५ सय ५५ सदस्यीय निर्वाचन कमिटी परिचालन गरिने बताइएको छ । उक्त प्रचारप्रसार अभियानमा रुकुम पश्चिमको सुशासन, विकास र समृद्धिलाई जोडेर जनता माझ प्रस्तुत हुने दुवै पार्टीको तयारी छ ।
आगामी निर्वाचनमा दुई पार्टी बिच भएको केन्द्रीय सहमति र निर्देशनलाई जिल्ला देखि टोल सम्म भद्र रूपमा पालना गर्दै अगाडि बढ्ने बताइएको छ । त्यस्तै प्रलोपा उम्मेदवार जनार्दन शर्माले विगतमा पनि निर्वाचनका बेला चुनावी तालमेल र गठबन्धन भएको भन्दै अहिलेको तालमेललाई जिल्लाको योजना निर्माण, परिचालन र विकास सङ्ग जोडिएको बताए ।
फागुन २१ गते हुने प्रतिनिधि सभा सदस्य निर्वाचनका लागि दुवै पार्टीले साझा चुनावी एजेन्डा र प्रतिबद्धता समेत तयार गरिएको बताएका छन् ।
प्रलोपा इन्चार्ज गोरख बहादुर केसीको अध्यक्षता तथा प्रलोपा उम्मेदवार जनार्दन शर्माको प्रमुख आतिथ्यता रहेको संयुक्त पत्रकार सम्मेलनको सञ्चालन एमाले सचिव शशीराम नेपालीले गरेका थिए । उक्त सम्मेलनमा प्रलोपाका केन्द्रीय सदस्य तथा पूर्व मुख्यमन्त्री राजकुमार शर्मा र नेकपा एमालेका केन्द्रीय सदस्य तथा रुकुम पश्चिम इन्चार्ज सुशील थापाको विशेष आतिथ्यता रहेको थियो ।
