रुकुम पश्चिम -२७, पुस ।
रुकुम पश्चिमको चौरजहारी नगरपालिकाबाट सञ्चालनमा रहेको सामुदायिक रेडियो आफनो एफएम ९० थोप्लो ४ मेगाहर्जले दशौं वार्षिकोत्सव मनाएको छ । आफनो स्थापना दिवसको अवसर पारेर आइतबार विविध कार्यक्रमको आयोजना गरी वार्षिकोत्सव मनाएको हो ।
मानव विकास तथा सामुदायिक सेवा र चौरजहारी सामुदायिक विकास केन्द्रद्धारा सञ्चालित सामुदायिक रेडियो आफनो एफएमले वार्षिकोत्सवको अवसरमा चौरजहारी अस्पतालमा भर्ना भएर उपचार गराईरहेका ६० जना बिरामीलाई फलफूल गरेको स्टेशन म्यानेजर गोपाल प्रसाद रेग्मीले बताए ।
उनका अनुसार चौरजहारी नगरपालिका भित्रका, अपाङ्गता भएका व्यक्ति, दीर्घरोगी, एकल महिला र जेष्ठ नागरिकहरुलाई डिजिटल रेडियो सेट र न्यानो कपडा वितरण गरिएको छ ।
रेडियोले १० जना जेष्ठ नागरिकलाई न्यानो कपडा, फाईवर सिरक र १८ जनालाई डिजिटल रेडियो सेट हस्तानतरण गरिएको रेग्मीको भनाइ छ ।
यहाँको वडानम्बर -१, स्याउली बजारबाट नियमित प्रसारणमा रहेको रेडियो आफनो एफएफले दैनिक १७ घण्टा प्रसारण सेवा दिँदै आईरहेको छ ।
यसैगरी वार्षिकोत्सवको अवसरमा कार्यक्रम स्थल सम्म पुग्न नसक्ने ६० वर्षदेखि १ सय २ वर्ष उमेर समूह तथा शारीरिक अपाङ्गता भएका व्यक्तिका लागि घरमै पुगेर मानव विकास तथा सामुदायिक सेवाका रेडियो प्रसारण विभाग संयोजक विजय मानन्धरले न्यानोकपडा तथा रेडियो सेट हस्तान्तरण गरे ।
२०७३ साल पुस २७ गते स्थापना भएको रेडियोले समाचार, सूचना, मनोरञ्जन लगायत विविध कार्यक्रमहरु सञ्चालन गर्दै आईरहेको छ ।
साथै रेडियो आफनो एफएमले आफनो स्थापना भएको ९ वर्षपुरागरी दशौँ वर्ष प्रवेशको अवसरमा एकसय वाट क्षमतालाई ५ सय वाटमा विस्तार गरेर आफनो प्रसारण सेवा सुरु गरेको छ ।
