भरत चन्द 

रुकुम पश्चिम -२६, पुस ।

नेपाली कम्युनिस्ट पार्टीका सह-संयोजक तथा पूर्व प्रधानमन्त्री माधवकुमार नेपालले पार्टी एकताप्रति जनताको उत्साह र भरोसा बढ्दै गएको दाबी गरेका छन् ।

सदरमुकाम मुसिकोट खलंगामा शनिवार पार्टीले आयोजना गरेको एकता सन्देश सभालाई सम्बोधन गर्दै नेता नेपालले नेपाली जनताको भावना अनुसार पार्टी एकता भएकाले जनताको उत्साह र भरोसा बढ्दै गएको दाबी गरेका हुन् ।

१७ कम्युनिष्ट घटक मिलेर पार्टी एकता भएपछि जनता खुसी भएको र सबै इमानदार कम्युनिस्ट शक्ति एउटै मोर्चामा एकताबद्ध भएर अघि बढिरहेको स्पष्ट पारे । त्यस्तै अहिलेको बृहत एकताले निर्वाचनमा समेत ऐतिहासिक जित हुने र जनताको हितमा काम गर्न सकिने नेता नेपालले बताए ।

उनले पछिल्लो समय युवापुस्ता समेत नेपाली कम्युनिस्ट पार्टीप्रति आकर्षित हुँदै गएको बताउँदै पार्टीप्रति जनताको आशा र भरोसा निरन्तर बढिरहेको उल्लेख गरे । समाजवादको एजेन्डा बोकेको पार्टीले विभेदको अन्त्य गर्दै स्वदेशमै रोजगारी सिर्जना गर्ने लक्ष्य लिएको उनको भनाइ छ ।

नेपालले अन्य पार्टी परित्याग गरी नेपाली कम्युनिस्ट पार्टीमा समाहित हुनेको संख्या बढ्दै गएको र पार्टी लोकप्रिय बन्दै गएकाले विगतका कमी–कमजोरी सच्याउँदै देशमा परिवर्तनको नयाँ लहर ल्याइने प्रतिबद्धता जनाए ।

उनले जनताको विश्वासलाई नै पार्टीको सबैभन्दा ठूलो शक्ति भएको उल्लेख गर्दै त्यसैको आधारमा मुलुकलाई समृद्धि र समाजवादतर्फ अगाडि बढाइने बताए ।