रुकुम पश्चिम -२४, पुस ।
नेपाली कम्युनिस्ट पार्टी रुकुम पश्चिमले जिल्ला पार्टी एकताको पूर्वसन्ध्यामा आज मुसिकोटमा मोटरसाइकल र्याली प्रदर्शन गरेको छ । पुस २६ गते आयोजना गरिएको एकता सन्देश सभाको सन्दर्भ पारेर ठूलो सङ्ख्यामा मोटरसाइकल र्याली प्रदर्शन गरेको हो ।
मुसिकोट नगरपालिका -३, माछिमी बाट सुरु गरिएको र्याली पिपलनेटा, सेरीगाउँ, बागबजार, खलङ्गा हुँदै सल्ले सम्म पुगेर पुनः सेरीगाउँ फर्केर र्याली अन्त्य गरिएको नेकपाले बताएको छ । आजको मोटरसाइकल र्यालीलाई नेकपाको शक्ति प्रदर्शनका रुपमा हेरिएको छ ।
पुस २६ गते खलङ्गामा आयोजना गरिएको पार्टी एकता सन्देश सभामा नेपाली कम्युनिस्ट पार्टीका संयोजक पुष्पकमल दाहाल प्रचण्ड र सहसंयोजक माधवकुमार नेपाल सहभागी हुने कार्यक्रम छ । उक्त सभामा हजारौँको सङ्ख्यामा पार्टी कार्यकर्ता उतार्ने तयारी नेकपाले गरेको छ ।
भव्य रुपमा आयोजना हुने पार्टी एकता सन्देश सभाको सम्पूर्ण तयारी समेत पूरा भएको सो पार्टीले जनाएको छ ।
